Beste beproefde bulle wys hul staal
Sommige bulle het ’n groot impak op die vleisbeesbedryf en genetiese vordering binne rasverband. Die wenners van die Beproefde Bul van die Jaar-eerbewyse word op die Aldam-veeskool daarvoor vereer.
Wenbulle het hulself reeds bewys wat betref die ekonomies belangrike eienskappe, soos vrugbaarheid, groei en karkaseienskappe.
Genetiese vordering is een van die belangrikste maatstawwe vir ’n ras om vooruitgang te bepaal. Die hoeveelheid genetiese vordering wat binne ’n ras gemaak word, hang grootliks af van die bulle wat gebruik word.
Die aanmoediging van genetiese vordering is een van die Lewendehawe-registrerende Federasie (LRF) se doelwitte. Daarom wys die LRF jaarliks ’n Zoetis, Landbouweekblad en Breedplan se Beproefde Bul van die Jaar aan vir al hul betrokke rasse.
Bulle wat in aanmerking kom, moet drie en ’n half jaar of ouer wees. Hulle moet ’n nageslag van minstens 100 in drie kuddes of meer hê. Van die nageslag moes 20 of meer in die afgelope twee jaar gebore gewees het.
Die bulle moet akkurate teelwaardes hê, en word volgens hul ekonomiese indekse gerangskik. Vir die rasse waarvoor indekse nie beskikbaar is nie, word ’n soortgelyke waarde bepaal deur ekonomiese gewigte aan hul teelwaardes te koppel. Die waardes sluit in geboorte-, speen-, jaaroud-, finale en volwasse koeigewig, asook skrotumomtrek.
Bulle moet ook aan minimum kriteria vir van die eienskappe voldoen.
Verlede jaar se wenners (sien die TABEL ) is uitstekende voorbeelde van gehalteteelbulle wat hul merk op stoet- en kommersiële kuddes laat.
Vanjaar se wenners word op die Aldam-veeskool se toekenningsgeleentheid op Donderdag 17 Oktober aangewys.