Wynmakers blom danksy dié eenheid
’n Doelbewuste poging deur die wynbedryf en organisasies soos Sawitu om nuwe toetreders te vestig, dra by tot die sukses van nuwe wynmakers en handelsmerke.
Ondanks ’n wisselvallige ekonomiese, omgewings- en politieke klimaat vind nuwe toetreders tot die wynbedryf hul weg. Hulle moet dikwels verskeie struikelblokke oorkom om hul ondernemings te vestig en te ontwikkel en om toegang tot die beperkte beskikbare ondersteuningsprogramme te kry. Dit sluit in toegang tot markte, kapitaalbeleggings in ondernemings, infrastruktuur, grond en eiendom, ’n handelshuis, vaardigheidsontwikkeling, verspreidingsnetwerke en etiese en maatskaplike ontwikkeling.
SAWITU
Die SA wynbedryf-transformasie-eenheid (Sawitu) is in 2016 deur die Nasionale Landboubemarkingsraad, Vinpro en die SA drankhandelsmerkvereniging (Salba) gestig. Die doel is:
■ Die skep en bevordering van billike toegang en deelname binne die wynwaardeketting.
■ Die versnelde ontwikkeling van die bedryfs- en finansiële vermoë van wynplase en besighede wat deur swart mense in die hele waardeketting besit word.
■ Groter verteenwoordiging van swart mense, veral swart vroue, op bestuursvlak in wynkelders, wynondernemings en bedryfsorganisasies deur onder meer die aanbied van meer bedryfsontwikkelingsprogramme.
■ Die bevordering van etiese praktyke binne die gemeenskap van belanghebbendes (waaronder werkers) deur die toepassing van etiese handelsprogramme in die wynbedryf.
■ Betrokkenheid by die opheffing en bemagtiging van werkers en swart gemeenskappe in die wynbedryf, die bevordering van verantwoordelike drankverbruik, en hulp met die strewe na ’n omvattende maatskaplike ooreenkoms vir die wynbedryf.
TRANSFORMASIE
Die doelwitte vir transformasie word aangepak met 20% van die heffings in die bedryf, wat deur verskillende belangegroepe in die wynbedryf betaal word.
Sawitu word sedert Februarie 2019 deur me. Wendy Petersen bestuur. Tot dusver is 25 wynhandelsmerke in swart besit bygestaan met finansiering, wetlike mentorskap en ondernemingsontwikkeling. Altesaam 65 handelsmerke en 60 plase in swart besit is op Sawitu se databasis geregistreer.
Om die ondersteuning aan sy lede te versterk, skakel Sawitu met verskillende organisasies in die bedryf, soos Vinpro, Wesgro, Salba, die SA Wynbedryfinligting en -stelsels, Winetech en Wines of South Africa, asook met regeringstrukture soos die provinsiale departement van landbou, die nasionale departement van landbou, die Landboubemarkingsraad en die departement van handel en nywerheid.
“Sawitu wil fundamentele verandering in die Suid-Afrikaanse wynbedryf teweegbring. Hoewel ons besef dat die huidige omstandighede dit moeiliker maak, reken ons dat Sawitu volhoubare groei en ontwikkeling vir ons ondernemings in swart besit kan bewerkstellig. Knelpunte met handels- en marktoegang is ’n groot bekommernis vir kleiner ondernemings. Sawitu moet nou saamwerk met die regering en bedryfsorganisasies om te verseker dat hierdie struikelblokke oorkom word,” sê Petersen.
GROEIPLANNE
Wat groei en ontwikkeling betref, het Sawitu die afgelope paar maande baie bereik. Heeltydse personeel is aangestel en ’n strategiese beplanningsessie is saam met ondernemings en boerderye in swart besit gehou. Geleenthede vir marktoegang is geskep en gesprekke is gevoer met kleinhandelaars, kopers en invoerders. ’n Maatskaplike ooreenkoms is onderteken, mentorskapsteun is geskep en ’n diensvlakooreenkoms is met kernvennote onderteken.
Sawitu het ook gekonsentreer op samewerking en kollektiewe bemarkingsinisiatiewe, het gelyke verteenwoordiging vir swart handelsmerke in die taakspanne van die wynbedryf verseker, ’n raamwerk vir EU-finansiering ontwikkel en ander geleenthede vir finansieringshulp vir swart ondernemings ondersoek.
BEMARKING
Deelname aan die gewilde plaaslike Tops at Spar-wynskoue het die sigbaarheid van wynhandelsmerke aansienlik vergroot onder die publiek en aankopers van kleinhandelaars.
Ses handelsmerkwyne onder die Sawitu-vaandel is op die inhuldigingsdinee van pres. Cyril Ramaphosa vir gaste geskink.
Altesaam 13 maatskappye in swart besit is vroeër vanjaar deur Sawitu gehelp om aan ProWein, die wêreld se grootste wyn-enspiritushandelskou in Düsseldorf, Duitsland, deel te neem.
Ander buitelandse bemarkingsgeleenthede is ook onlangs in Finland, Ghana en Denemarke ondersoek.