Nuwe aanslag bring groep nader aan kliënte
Mexichem, Netafim se moedermaatskappy, het in September vanjaar sy nuwe handelsmerk, waardes en naam bekend gestel. Dié wêreldwye onderneming staan nou as Orbia bekend en het ten doel om ‘die lewe reg oor die wêreld’ te bevorder.
Netafim en Mexichem behaal al twee jaar lank saam sukses. Mexichem het in Februarie verlede jaar die verkryging van ’n 80%-belang in Netafim voltooi.
Ná die verkryging was Netafim steeds die wêreldleier op die gebied van oplossings vir presisiebesproeiing. Die transaksie het Netafim se internasionale leiersposisie verder versterk, terwyl Mexichem se verhoogde hulpbronne, geografiese reikwydte, produkportefeulje en uitgebreide ervaring in bedrywighede groter stukrag aan Netafim gegee het. Hierdie veranderinge het geen regstreekse invloed op Netafim Suid-Afrika se kliënte in die Suid-Afrikaanse wyn- en wingerdbedryf nie.
Op 5 September is ’n nuwe fase betree toe mnr. Daniel Martinez-Valle, uitvoerende hoof van die voormalige Mexichem, bekend gemaak het die wêreldwye onderneming sal voortaan as Orbia bekend staan, en die nuwe handelsmerk en waardes bekend gestel het. Die oogmerk is om “die lewe reg oor die wêreld” te bevorder.
Die verandering is genoodsaak deur die omvattende transformasie en groei wat die maatskappy, wat in 1953 gestig is, ondergaan het sedert die naamsverandering in 2005 na Mexichem.
“Om ’n doelgerigte maatskappy vir die toekoms te word, moes ons onsself organiseer op ’n manier waarby ons kliënte die beste baat vind. Almal moet ’n rol speel om die internasionale probleme wat ons in die gesig staar, die hoof te bied. Dit kan slegs aangepak word as ons saamwerk en ons denke van ‘ek’ na ‘ons’ verskuif,” het Martinez-Valle gesê.
“Dit het baie werk en gesprekke geverg om te verstaan hoe ons as ’n onderneming beskou kan word en hoe ons onsself kan transformeer. Dit was ’n lang proses om die konsep van Orbia te ontwikkel. Vandag is ons gereed en oop vir die wêreld. Ons is gereed om ander deel van ons ambisie te maak. Ons is gereed om uitdagings die hoof te bied en ons is gereed om as ’n span saam te werk.”
KRAG EN STRATEGIE
As Orbia se verteenwoordiger in die landboubedryf het Netafim ’n daadwerklike en belangrike rol in hierdie proses gespeel.
In sy aankondiging het Martinez-Valle klem gelê op die onderneming se langtermynverbintenis tot mense, die aarde en die krag waarmee hy die wêreld wil beïnvloed.
Die naam Orbia spruit uit hierdie wêreldwye impak. “Orb” is afgelei van die Latynse woord “orbis”, vir sferies. “Bia” is ’n woord uit die Griekse mitologie wat dui op die verpersoonliking van krag. Orbia kan vertaal word as “’n krag vir die wêreld”.
Met sy nuwe naam en langtermynstrategie is Orbia gereed vir geleenthede wêreldwyd om voedselsekerheid te verseker, waterskaarste te verminder, die toekoms van stede en huise te herskep, gemeenskappe met inligtingsinfrastruktuur te verbind, en toegang tot gesondheid en welstand met gevorderde materiaal uit brei deur vernuwing en klantgerigtheid. Dit verhoog die onderneming se verbintenis tot die verbetering van die lewensgehalte van gemeenskappe oral ter wêreld.
Chemikalieë, mynbou en vervaardiging sal steeds ’n belangrike deel van Orbia se algehele
besigheid uitmaak, maar die naamsverandering weerspieël ’n breër, inklusiewer uitdrukking van die maatskappy se wêreldwye impak.
Orbia is ’n groep ondernemings wat verbind is tot die gemeenskaplike doelwit om lewe reg oor die wêreld te bevorder. Om dit te bereik, is Orbia nou in vyf sakegroepe georganiseer. Dié sakegroepe dryf handel met bedrywe wat noodsaaklik is vir hoe mense vandag leef en hoe die toekoms daar sal uitsien.
Die vyf groepe is:
■ Presisielandbou.
■ Bou en infrastruktuur.
■ Fluor-maatskappy.
■ Datakommunikasie.
■ Polimeeroplossings. Orbia wil die volgende vrae beantwoord:
■ Hoe kan ons die wêreld volhoubaar voed?
■ Hoe kan ons waterstelsels beter bestuur?
■ Hoe kan ons stede leefbaarder, liefdevoller en veerkragtiger maak?
■ Hoe verbind en bemagtig ons gemeenskappe met data?
■ Kan gesondheid en welstand toegankliker gemaak word?
■ Hoe vorder ons van volhoubaarheid tot regenerasie en herontwikkeling?
SLIM OPLOSSINGS
Orbia se betrokkenheid by presisielandbou word bewerkstellig deur Netafim, die wêreldleier op die gebied van slim besproeiingsoplossings.
Netafim het 29 filiale wêreldwyd, waarvan Netafim Suid-Afrika een is. Die maatskappy is in Kraaifontein in die Wes-Kaap gesetel. Netafim is toegespits op oplossings om die wêreld volhoubaar te voed en waterstelsels beter te bestuur.
Die doelwit van hierdie sakegroep is om boere in staat te stel om ’n groter opbrengs van ’n beter gehalte te lewer, terwyl hulle minder water, kunsmis en ander insette gebruik. Netafim se slagspreuk weerspieël dié doelwit: Lewer meer met minder (“Grow more with less”).
VERBINTENIS
Martinez-Valle sê die primêre daaglikse werksaamhede van
die verskillende sakegroepe sal nie verander nie. “Ons beoog wel om baie meer kliëntgerig te word. Ons wil nader aan die kliënt beweeg.”
Netafim se leierspan het hierdie boodskap herhaal.
“Ons wil dit duidelik stel dat Netafim se handelsmerk, doel en waardes dieselfde bly, maar ons is ook sterk verbind tot Orbia se nuwe handelsmerk en waardes,” sê mnr. Etienne Erasmus, besturende direkteur van Netafim Suid-Afrika.
“Daar sal geen verandering in die daaglikse werksaamhede wees nie. Ons is opgewonde om steeds Orbia en Netafim se doel in die SAOG-streek na te streef,” voeg Erasmus by.
MEET VORDERING
Orbia besef sy doelwitte is vloeibaar en wil sy vordering oordra namate hy die doelwitte bereik. Dit het daartoe gelei dat die handelsmerkontwikkelingspan ’n sogenoemde ImpactMark, pleks van ’n logo, ontwerp het.
Die ImpactMark is ’n voortdurend veranderende maatstaf van die onderneming se verbintenis tot finansiële gesondheid, omgewingsvolhoubaarheid en maatskaplike vooruitgang op lang termyn. Die ImpactMark, wat op ’n sirkelrooster geplaas is, meet die vordering teen ses faktore wat verband hou met mense, die aarde en wins. Dit sal elke jaar bygewerk word om die nuutste gegewens te weerspieël, en sal mettertyd die vordering tot die onderneming se ambisieuse doelwitte toon.
“Ons streef voortdurend daarna om ’n ideale sirkel te voltooi, wetende dat ons nooit volmaaktheid sal bereik nie,” sê Martinez-Valle.
Orbia se doelwitte is:
■ Optimaliseer beleggings.
■ Verminder vrystelling van kweekhuisgasse.
■ Ontwikkel in ’n vernuwende oplossingsverskaffer.
■ Verminder afval wat veroorsaak word.
■ Leer die arbeidsmag bykomende vaardighede.
■ Vermeerder vroue in bestuursposisies.