SA wynmaker verkies CHEP se ‘groen’ palette
CHEP, ’n maatskappy wat oplossings vir die verskaffingsketting verskaf, werk al langer as ’n dekade saam met die Suid-Afrikaanse wynprodusent-en-uitvoerder Origin Wine. CHEP verskaf omgewingsvriendelike palette wat oor en oor gebruik kan word.
Origin Wine, wat op Stellenbosch in die Wes-Kaapse wynstreek geleë is, het gegroei van ’n tweemansaak 17 jaar gelede tot ’n wêreldwye onderneming met bykans 350 werknemers wat meer as 40 miljoen liter wyn per jaar verkoop. Wyn word onder meer na Brittanje, Rusland, Nederland, China, Kanada, Swede, Amerika, Denemarke en Duitsland uitgevoer.
Origin Wine is in private besit en is ’n ten volle vertikaal geintegreerde onderneming wat druiwe en wyne van reg oor die wêreld verkry. Die maatskappy het satellietkantore in Brittanje, Swede, Kanada en Switserland. Die onderneming se belangrikste handelsmerke is Stormhoek en Grand Vin de Stellenbosch.
“Waardeverhoging en volhoubaarheid is twee belangrike neigings wat ons tans waarneem. Mense is bereid om meer te betaal vir ’n produk van hoër gehalte. Ons moet voortdurend nuwe idees en markte verken. Volhoubare produksie is ’n groot bron van kommer en vereis ons voortdurende toewyding. Ons beskou dit as ons verantwoordelikheid om in vennootskap met ons klante te werk om die koolstofspoor te verminder van die produkte wat ons verhandel,” sê me. Lise Ewins, bemarkingsbestuurder van Origin Wine.
PRODUKSIEGERIEWE
Origin Wine se produksie vind plaas op ’n terrein van 16 ha by Stellenbosch, en die boerdery benut 10,7 ha uitsoekwingerde. Daar is ’n mengkelder met 64 tenks met ’n houvermoë van 3,2 miljoen liter, drie produksielyne met ’n gesamentlike produksievermoë van 10 000 bottels per uur, waaronder ’n sak-in-bokslyn met ’n gesamentlike produksievermoë van 180 sakke per uur. Origin Wine het ook ’n ten volle geakkrediteerde laboratorium en ’n pakhuis van 2 200 m².
“CHEP is ons voorkeurverskaffer vir versending danksy die ekonomiese en volhoubare voordele wat ons kry deur herbruikbare palette te gebruik. CHEP lewer ook uitstekende diens. CHEP het weereens sy toewyding as ’n logistieke vennoot bewys deur Origin Wine by te staan met ’n mededingende kostestruktuur in ’n moeilike jaar,” sê me. Colleen Carstens, beplanningsen logistieke bestuurder van Origin Wine.
“Met die huidige klem op volhoubaarheid glo ek herbruikbare palette sal die voorkeurverspreidingsmetode in SuidAfrika word – moontlik selfs verpligtend. CHEP is daarop toegespits om sy kliënte te verstaan, en daarom het ons die afgelope dekade ’n goeie vennootskap met hulle opgebou,” sê Carstens.
“Origin Wine gebruik toenemend net palette wat hergebruik kan word. Die koste om gewone wit palette aan te koop, styg voortdurend. Hierdie palette is ook van ’n swakker gehalte en is minder duursaam, wat ’n mate van risiko vir logistieke bedrywighede meebring. CHEP-palette is altyd van dieselfde gehalte en sterkte, wat die kans op produkskade tot die minimum beperk,” sê mnr. Chris Perumal, direkteur van vinnig bewegende verbruikersgoedere (FMCG) by CHEP Suid-Afrika.
“CHEP wil die volhoubaarste produk op die mark beskikbaar stel,” sê me. Nomathemba Mhlanga, senior volhoubaarheidsbestuurder by CHEP.
“Ons het dus dieselfde visie as Origin Wine om lewens te verander in die gemeenskappe waarin albei maatskappye werk.”
ONTWIKKELING
CHEP en Origin Wine voer samesprekings oor die bemagtiging van plaaswerkers sodat werkers meer vaardighede kan aanleer. Die maatskappye wil ook onderontwikkeling beperk deur klem te lê op vroeë kinderontwikkeling in die wynstreke.
Origin Wine se Fairhillsprojek, ’n internasionaal geakkrediteerde maatskaplike opheffingsprojek van Fairtrade, is in 2005 in die Breedekloof gestig. Die doel is om deur die maatskappy se wynhandelsmerke ’n inkomste te skep ten einde die gemeenskappe op te hef deur die ontwikkeling van meer vaardighede en die daarstel van beter geriewe. Meer as 2 000 mense word tans in Suid-Afrika, Chili en Argentinië ondersteun deur hierdie projek.