BOEREKOS 15 Die ekstra-dik feesuitgawe is hier!
Dit gebeur nie aldag dat ’n eeu in die tydskrifbedryf gevier word nie. Daarom vier ons Landbouweekblad se 100ste verjaardag in die splinternuwe uitgawe van Boerekos – ’n bielie van 196 bladsye met iets vir elke smaak.
Heel, gebraaide varklies met appelsider en mosterdroomsous
Om te verseker dat ’n heel varklies wat oor die kole gebraai word, sag en sappig is, maak ek altyd die vleis vooraf in ’n aromatiese aftreksel gaar, voor ek dit verder oor die kole afrond.
1 heel middelslag-varklies, met vel 500 ml appelsider
Water
1 ui, in kwarte gesny 3 knoffelhuisies, gekneus Stukkie vars gemmer 3 steranyssade
1 kaneelstok 5 wonderpeperkorrels (pimento) Witasyn en sout (opsioneel)
Bedruipsous
125 ml appelsider
45 ml vars gemmer
80 ml elk soetrissiesous, sojasous, heuning ■ en bruinasyn
Sout en swartpeper na smaak
Sit die varklies in ’n kastrol waarin dit gemaklik pas en giet die appelsider oor. Voeg genoeg water by om die vleis te bedek. Voeg die ui, knoffel, gemmer, steranyssade, kaneelstok, wonderpeperkorrels, witasyn en sout by en verhit tot kookpunt. Prut stadig oor lae hitte vir ongeveer 1 uur tot die vleis sag is. Laat die vleis in die aftreksel afkoel tot louwarm voor jy dit uithaal en in ’n geskikte bak sit. Trek die vel af en maak vlak insnydings in die vet. Berei die bedruipsous: Verhit die appelsider, gemmer, soetrissiesous, sojasous, heuning en bruinasyn saam tot kookpunt. Voeg 250 ml van die aftreksel waarin die varklies gaargemaak is by die bedruipsous en verhit weer tot kookpunt. Prut vir 5 minute. Giet die sous oor die varklies en laat dit vir 30 minute daarin staan voor die lies stadig in ’n toeklaprooster oor matige kole gebraai word. Geur met sout en peper en bestryk gereeld met die bedruipsous terwyl jy die vleis tot goudbruin en klewerig braai.
Haal die vleis van die rooster af, bedek met foelie en laat rus vir ’n paar minute voor jy dit in porsies sny. Sit voor met mosterdroomsous. Lewer 10 porsies.