Lamsvleispastei
Vir hierdie pastei het ek heel lamsnek gekies, gebak tot die vleis van die bene afgeval het, maar jy kan enige gaar oorskiet-lams- of -skaapvleis gebruik. Boud of bladvleis sal ook perfek werk.
Suurroomdeeg
750 ml koekmeel 200 g botter 250 ml suurroom Yswater, indien nodig 1 eier, vir verf
Vulsel
1 groot ui, gekap
2 knoffelhuisies, fyngekap
30 ml olie
1 kg gaar lams- of skaapvleis, gevlok of fyngesny
15 ml koekmeel
Sout, peper en neutmuskaat na smaak
Hand vol geroosterde dennepitte (opsioneel)
Deeg: Verwerk die meel en botter in ’n voedselverwerker tot krummelrig (of vryf die botter met jou vingerpunte by die meel in). Voeg die suurroom by en meng tot ’n deeg vorm (voeg ’n paar druppels yswater by indien die mengsel te droog lyk). Druk die deeg effens plat en draai dit toe in kleefplastiek of waspapier. Verkoel vir 1 uur.
Vulsel: Braai die ui en knoffel stadig in ’n groot pan in die olie tot sag. Voeg die gevlokte (of gesnyde) vleis by en braai tot deurwarm (jy kan ’n spatsel water of aftreksel byvoeg as daar nie genoeg vet in die vleis is om vloeistof te vorm nie). Sprinkel die meel oor en sit die pan terug op die hitte. Verhit, terwyl geroer word, tot kookpunt. Laat prut tot die pansouse effens verdik is en geur dan met sout, peper en ’n bietjie neutmuskaat. Laat die vulsel tot kamertemperatuur afkoel voor jy die pastei maak.
Voorverhit die oond tot 200 °C en smeer ’n hoë losboomkoekpan van 17 cm met botter of bespuit met kleefwerende kossproei. Sny ’n kwart van die deeg af en hou eenkant. Rol die res van die deeg op ’n meelbestrooide oppervlak uit en voer die pan daarmee uit. Sny die bokant netjies gelyk. Skep die afgekoelde vulsel in die pan en druk goed vas.
Rol die res van die deeg uit en bedek die vulsel daarmee. Seël die kante met ’n vurk, versier die pastei bo-op met stukkies afvaldeeg en verf met geklitste eier. Bak vir 10 minute en verlaag dan die temperatuur tot 170 °C. Bak vir nog 20-25 minute tot goudbruin en bros. Haal uit die oond, laat vir 10 minute in die pan afkoel en koel verder af op ’n draadrak. Die pastei kan teen kamertemperatuur of selfs koud voorgesit word. Lewer 6-8 porsies.