Knoffel-en-kruieskaapboud met bros neutegratin
Vleis
1 skaapboud van ongeveer 3 kg 8 knoffelhuisies
Olyfolie
Worcestersous
Seesout en varsgemaalde swartpeper Paar takkies roosmaryn
Bolaag
250 ml vars broodkrummels
1 knoffelhuisie, fyngerasper
30 ml olyfolie
80 ml dennepitte
80 ml pimperneute, grofgekap
10 ml fyngekapte, vars salie of tiemie Sout en varsgemaalde swartpeper na smaak Voorverhit die oond tot 160 °C. Steek gaatjies oral oor die boud met ’n skerp dunlemmes. Sny elke knoffelhuisie middeldeur (of selfs kleiner) en steek ’n stukkie knoffel in elke gat. Smeer die skaapboud goed met olyfolie, besprinkel ruimskoots met worcestersous, seesout en swartpeper. Sit die boud in ’n baksakkie saam met ’n paar takkies vars roosmaryn en bind deeglik toe. Gebruik ’n sosatiestokkie om ’n paar gaatjies in die baksakkie te maak sodat die stoom kan ontsnap. (Die gaatjies moenie so groot of laag wees dat vloeistof kan uitlek nie.) Bak vir 2½-3 uur tot die vleis effens meegee en sag voel wanneer jy met jou vinger op die dikste deel van die boud druk.
Haal die boud uit die oond en laat staan vir minstens 20 minute in die baksakkie. Haal die boud uit die sakkie en sit dit op ’n bakplaat of opdienbord. Giet die pansouse in ’n kastrol en hou eenkant. Verhoog die oondtemperatuur tot 190 °C.
Meng die bestanddele vir die bolaag saam en skep dit oor die boud. Druk dit liggies met jou vingers op die vleis vas. Oondrooster die vleis sonder ’n deksel vir ongeveer 20-30 minute tot die krummellaag goudbruin en lekker bros is. Haal die vleis uit die oond en laat dit vir ’n paar minute rus. Maak ’n vleissous van die pansouse, ’n bietjie soetwyn en room en sit dit saam met die vleis voor. Lewer 8 porsies.