KEN JOU MIKRO-ORGANISMES
Volgens mnr. Gary Farr is daar slegs twee redes is hoekom mikrobes in die grond oorleef. Dit het aangepas om onafhanklik te oorleef of dit het ’n simbiotiese verhouding met plante of diere ontwikkel. Op grond van hierdie eienskap, kan organismes in drie hoofgroepe gedeel word, naamlik saprofiete, patogene en simbiote.
Saprofiete is die organismes wat onafhanklik van ander lewende organismes in die grond lewe en op dooie, organiese materiaal oorleef. Patogene is die organismes wat op ander lewende organismes, hetsy mikrobes, plante of diere, teer. Simbiote is die organismes wat in simbiose met ander mikrobes, plante en diere oorleef. Vir ’n gesonde ekostelsel is sowel saprofiete as simbiote noodsaaklik. Albei kan deur goeie bestuur aangemoedig word, om jou gronde te koloniseer en vir jou boerdery van waarde te wees.
Daar is drie maniere om organismes en biologiese produkte, soos kompostee, in jou boerdery toe te dien. Dit kan as ’n saadbedekking of direkte grondtoediening gedoen word, wat gewoonlik as ’n inenting beskryf word of dit kan as ’n blaarvoeding toegedien word.
Rhizobium. Die gebruik om plante en grond met mikrobe in te ent, is ’n baie ou gebruik en Rhizobium is die bekendste mikrobe waarmee dit gedoen word. Dit kan egter ook met sekere trichoderma gedoen word. Rhizobium is ’n endofiteise bakterie wat ’n simbiotiese verhouding met peulgewasse vorm deur die wortels binne te dring en te koloniseer. Dan absorbeer die Rhizobia atmosferiese stikstof en verwerk dit tot in ’n opneembare vorm vir die plant. In ruil hiervoor gebruik die rhizobium-bakterie suikers uit die plantwortels, wat deur die plant gedurende fotosintese vervaardig is, om te oorleef. Die rhizobia skei ook van hierdie opneembare stikstof in die grond af wat dan vir ander plantwortels beskikbaar raak.
Wanneer ’n mikrobe as endofities geklassifiseer word, beteken dit dat die mikrobe ’n “wortel” in die plant inboor en dan binne die plantwortel ingroei. ’n Endofitiese mikrobe bestaan meestal in ’n wedersydse voordelige wyse saam met die plant. Indien die verhouding die plant benadeel, sal die mikrobe as ’n parasiet of patogeen geklassifiseer word. Ektofitiese mikrobe groei buite die plant en gebruik die koolhidraatryke worteluitskeidings of vorm wedersydse voordelige bande met mikorisa. Hierdie mikrobe maak onopneembare mikro- en makro-elemente in die grond beskikbaar aan die wortels.
Mikorisa. Mikorisa is ’n swam en onder gunstige omstandighede vorm dit ’n netwerk van swamdrade wat as ’n hiper-doeltreffende goederetrein-netwerk in die grond beskryf kan word. Hierdie netwerk verbind verbruikers met die produsent tot voordeel van elke individu in die netwerk en die brandstof wat hierdie netwerk dryf, is hoofsaaklik koolstofdioksied, sonlig en water. Dit verbind verskillende plante en mikrobes oor en weer deurdat een punt van die mikorisa in die plantwortel in boor en die ander punt reik uit na voedingstowwe en simbiote, die mikroörganismes wat onafhanklik in die grond lewe.
Die mikorisa ontvang koolhidrate uit die plantwortels om te groei en neem voedingstowwe wat deur die simbiote vervaardig word, op en vervoer dit terug na die plantwortel. Die mikorisa kan ook vog op hierdie manier bekom en aan die plantwortel beskikbaar stel. Die mikorisa vergroot dus die area wat deur die plantwortels bereik kan word om voedingstowwe en water in die hande te kry en van daar die voordeligheid van mikorisa aan die produsent.