Meer wins danksy biologiese balans
Verdubbel jou opbrengs en besnoei jou koste deur die regte grondbestuursbeginsels na te volg – en raak in die proses boonop minder afhanklik van chemiese middels.
Moenie chemiese middels heeltemal saam die biologiese badwater uitgooi nie. Die regte balans tussen die twee in korrekte grondbestuur lei tot ’n verdubbeling in opbrengs. Oor die afgelope agt jaar het me. Chloe Clegg, suikerriet- en groenteboer van Harding in KwaZulu-Natal, suikerriet-opbrengs op sommige landerye verdubbel. (Sien ook “Só verdubbel jy opbrengs: Erdwurms en waagmoed,” LBW, 16 Augustus 2019.)
Sy skryf hierdie verhoging in opbrengs toe aan die integrasie van biologiese middels met chemiese produkte met die doel om gesonde, voordelige en ten volle selfonderhoudende ekostelsels in haar boerdery te vestig. “Ons kry dit reg om ons gronde en gewasse in te ent met diverse, voordelige mikro-organismes. Hierdie inenting het ’n uitstekende voedingswerking, maar help ook om plaagen siektebestryding in die plant te bevorder.
“Op party landerye het ons opbrengste sedert 2011 meer as verdubbel met die toediening van ’n kombinasie van biologiese en chemiese middels. Ons dien nou minder chemiese middels toe as in 2011 en dus kan die verhoogde opbrengs nie daaraan toegeskryf word nie, maar eerder aan die verhoogde diversiteit van lewende organismes in die grond en op die plante. Ons sien ’n aansienlike vermindering in patogene bakterieë sedert ons die biologiese middels begin toe
dien het,” verduidelik Clegg.
Hoewel sy nog nie bepaal het watter spesies in haar grond op watter tydstip floreer nie, sien sy genoeg goeie resultate oor ’n lang genoeg tydperk om haar te oortuig van die doeltreffendheid van haar strategie.
Mnr. Mark Stein, ’n graanboer, is die afgelope drie jaar reeds ’n finalis in die Weeg-en-Wen-kompetisie en het die afgelope groeityd slegs een maal teen blaarsiektes gespuit – en dit was voorkomend. In teenstelling daarmee moes hy vier tot vyf maal
vir blaarsiektes bespuit voor hy voorrang aan sy grondgesondheid gegee het.
Mnr. Gary Farr, ’n plantvoedingkonsultant wat Clegg en Stein raad gee, en ’n klankbord vir Clegg is wanneer sy besluite oor biologiese produkte maak, sê hy integreer mikrobes en die biologiese produkte suksesvol, maar dat biologiese produkte nie as ’n towerkuur beskou moet word nie.
“Die moderne landbou is hoofsaaklik gegrond op chemiese insette, wat ál duurder en problematies raak, terwyl die grond nie ’n chemiese stelsel is nie, maar ’n komplekse biologiese stelsel.”
Farr sê in deursnee-grondontledings word net na die chemiese samestelling gekyk sonder om die bydrae wat die biologiese komponent lewer, in ag te neem. “Grondorganismes speel ’n sleutelrol in voedingstofvrystelling, die onderdrukking van plae, grondstruktuur en vogbeskikbaarheid. Wanneer ons dus dié grondorganismes – die grondbiologie – laat herlewe, skep ons gesonder, produktiewer omstandighede vir gewasproduksie teen ’n laer koste.”
BOOTS NATUUR NA
“As grondbenutters moet ons doel wees om die natuur na te boots, waar lewe sonder chemiese inmenging floreer. Indien ons egter alle chemiese produkte laat vaar, stuur ons af op ’n katastrofe omdat ons daarmee talle spesies wat verskillende funksies moet verrig, uitgeroei het. Ons is dus afhanklik van die
chemiese middels, maar dit is moontlik om onsself van daardie afhanklikheid te speen.”
Farr verwys na hoe mnr. Alan Savory, die vader van holistiese bestuur, die natuur naboots met ultrahoëdrukbeweiding en hoe dit natuurlike grasvelde toegelaat het om mettertyd volkome te herleef, terwyl die drakrag twee tot vier maal verdubbel het. “Dit is duidelik dat natuurlike stelsels wel kan herleef en dat ons die natuur kan naboots en van chemiese insette afstand kan doen.”
In gewasproduksie is daar sekere gebruike wat toegepas kan word om hierdie speenproses aan die gang te sit wat jou uiteindelik die resultate sal gee wat Stein en Clegg in hul boerderye ervaar, waar hulle met minder
besteding aan insette, dieselfde en selfs ’n groter opbrengs in hul boerderye bewerkstellig.
■ Skep mikrobe-korale wat met mikorisa-netwerke verbind word. (Sien .)
■ Wend voordelige mikrobes wat stresbestand is aan. Dié mikrobes tree as surrogate op vir die natuurlike, inheemse mikrobes terwyl die herlewingsproses aan die gang is.
■ Gebruik biologiese produkte wat plantgroeikragtigheid en -gesondheid bevorder.
■ Bedek die grondoppervlak met ’n organiese kombers wat sal help om grondlewe, soos erdwurms, in die bogrond te beskerm en organiese inhoud, veral water-oplosbare koolstof, te vermeerder.
■ ’n Multiplantsoortdekgewas sal verder die grondbiologie verbeter en ’n habitat vir voordelige organismes skep, soos sonbesies en parasitiese wespe.
■ Gebruik vee om die grond in te ent met voordelige mikrobes en om die biologiese siklusse in die grond te voltooi. ■ Gebruik heeljaar gepaste rotasies waar dit moontlik is.
MIKROBE-KORAAL
Wanneer mense aan mikrobes en biologiese middels dink, moet hulle aan ’n lewende stelsel dink pleks van produkte deur ’n spuitpomp toe te dien. “Ons kan mikrobes voed en ’n veilige tuiste skep, wat ek ’n mikrobekoraal noem,” sê Farr.
In so ’n koraal sal veilige gebiede wees waar mikrobes skuiling kan vind teen groter predatore soos protozoa en nematodes. Bio-steenkool, wat mikroskopies klein holtes en kanale bevat, is ’n goeie voorbeeld daarvan. “Dit is voordelig om goed verrotte organiese materiaal in dié dele beskikbaar te maak, wat die vermeerdering van aangepaste mikrobe in die grond sal aanhelp.”
Hy sê baie mense vra hoekom mikrobes en biologiese middels toegedien moet word indien die grond dit self kan vermeerder. “Hoewel baie navorsing al gedoen is, weet ons nog nie watter spesies koloniseer en vestig selfonderhoudende bevolkings in watter omstandighede nie. Ons moet dus die organismes toedien wat wel ’n bevestigde rol in die onderskeie funksies speel.
“Ek sien hierdie toedienings as ‘surrogaat-organismes’. Deur navorsing ken ons die werking van die organismes, maar daar is geen bewyse dat hulle aangepas is om in spesifieke omstandighede te oorleef nie. Deur die mikrobe-koraal skep ons ’n gunstige omgewing vir ’n aangepaste, natuurlike mikrobelewe om pos te vat om hierdie funksie te verrig. Ons koop dus as ’t ware tyd.”
Farr meen deur die bestryding met biologiese middels hou die boer nie die bose kringloop aan die gang waardeur die habitat vir diverse mikrobelewe deur volgehoue chemiese toediening vernietig word nie.
Nóg ’n rede hoekom die boer volgehou mikrobes moet toedien, is omdat die mikrobes nie altyd as ’n grondtoediening aangewend word nie, maar eerder as ’n blaartoediening. “Clegg vind onder meer goeie roesonderdrukking by haar suikerriet deur die wurmtee as blaarvoeding toe te dien. Watter mikro-organismes vir die onderdrukking van die roes verantwoordelik is en hoe die onderdrukking plaasvind, is nog nie nagevors of bevestig nie.”
VERBETERDE NAVORSING
Navorsing oor en die ontwikkeling van biologiese middels en lewende organismes as insette vir doeltreffender produksie begin egter ál meer momentum kry. Die hoë druk in spuitpompe en UV-gevoeligheid van biologiese middels bemoeilik dikwels die toediening, sê Farr.
Nuwe tegnologie wat as oplossing vir die probleme ontwikkel is, is mikro-bedekking. Dis ’n metode waartydens swamspore in ’n kleilagie bedek word om hitte, UV-strale en selfs chemikalieë te kan weerstaan. “Dit beteken hierdie spore kan saam met chemiese middels, soos kunsmis, bo-op droë grond toegedien word sonder om dit in te werk. In die verlede moes dié spore eers ná sononder toegedien en ingewerk of ingewas word, wat baie boere afgeskrik het weens die tydrowendheid en die koste van die toediening.”
Beter gefinansierde navorsing bring ook ’n ál groter begrip van die funksionaliteit en oorlewingsvereistes van mikrobes. “So het ons uitgevind sommige mikrobes is endofieties en kan help met siektebestryding en plantgesondheid. ’n Voorbeeld is die Cp3stam van die Methylobacterium. Dié bakterium help om plante teen swaarmetaaltoksisiteit te beskerm.”
Indien ons egter alle chemiese produkte laat vaar, stuur ons af op ’n katastrofe omdat ons daarmee talle spesies wat verskillende funksies moet verrig, uitgeroei het.
NAVRAE: Mnr. Gary Farr, e-pos: raspec18@ gmail.com