Boeke: In Japan, ja!
Die reisskrywer Erns Grundling se boek Sushi en Shosholoza het kort voor die begin van die Wêreldbeker-rugbytoernooi verskyn. Dis soos ’n gids tot Japan vir Suid-Afrikaners wat tans daar toer om die Bokke te ondersteun of vir diegene wat nuuskierig is oor dié besondere land.
VERTEL ’N BIETJIE VAN DIE RUGBYKULTUUR IN JAPAN?
Die Japannese is nie rugbymal soos ons dit ken nie. Sumo is die nasionale sport en bofbal en sokker is gewilder as rugby. Maar rugby het ’n lang geskiedenis in Japan: Die eerste wedstryd is so ver terug as 1866 in Yokohama gespeel. Japan het sover in ál die Wêreldbeker-rugbytoernooie gespeel en sy bekende oorwinning oor die Springbokke in 2015 het miljoene Japannese vir die eerste keer van rugby laat kennis neem. Ek skryf in Sushi en Shosholoza veral oor rugbyreise in Japan.
WAAROM, DINK JY, WAS JAPAN ’N GOEIE KEUSE AS GASHEERLAND VIR DIE WÊRELDBEKERTOERNOOI?
Dit is goed en noodsaaklik vir die ontwikkeling van rugby dat die toernooi vir die eerste keer in Asië plaasvind. Iets wat ek so dikwels hoor wanneer ek met buitelanders – veral Suid-Afrikaners – in Japan praat, is die frase “alles werk”. Dit voel werklik so. Japan se infrastruktuur en veral openbare vervoer is wêreldklas en buitengewoon stiptelik, wat dit baie maklik maak vir ondersteuners om na die stadion en tussen die onderskeie stede te reis. Japan is ook ’n baie veilige land. Jy kan in die nag op straat rondstap sonder om een keer oor jou skouer te kyk. En as jy jou slimfoon, beursie of enigiets anders op ’n trein of bus vergeet, is jy byna gewaarborg om dit terug te kry.
WAT HET JOU DIE MEESTE VERRAS VAN DIE LAND EN SY MENSE?
Japan het byna 127 miljoen inwoners, maar twee derdes van die land se oppervlak te is woud- en bergagtig. Dit verras my keer op keer hoe ordelik, stiptelik en netjies die Japannese is, en hul respek en hoflikheid, ook teenoor toeriste. Dit is wel ’n baie geslote kultuur. Ek dink ’n Westerling sal hier altyd soos ’n buitestaander voel, maar ek vind die Japannese in die algemeen baie vriendelik en behulpsaam. En ook geduldig wanneer ek etiketreëls oortree.
VRYF DIE JAPANNESE STEEDS DÁÁRDIE BRIGHTON-WEDSTRYD ONDER SUIDAFRIKANERS SE NEUSE?
Ek dink die Japannese is heeltemal te hoflik om enigiets onder iemand se neuse te vryf! Maar ja, wanneer hulle hoor jy is van Suid-Afrika, word daardie wedstryd dikwels bespreek, met ’n verbaasde laggie, asof hulle steeds nie kan glo dit het gebeur nie. Maar nouda tJ apan teen Ierland gewen het in ’n onlangse groepwedstryd is dit dalk ’n ander span met groen truie se beurt om te bloos!
WAT SAL JY VIR SUID-AFRIKANERS WAT JAPAN BESOEK, AANBEVEEL OM TE DOEN OF TE SIEN, BUITEN NATUURLIK OM DIE BOKKE TE ONDERSTEUN?
Daar is só baie om in Japan te beleef. As jy hou van adrenalien-aktiwiteite, kan ek die Fuji-Q Highland-pretpark by Fujiyoshida se rollercoasters aanbeveel – op ’n mooi dag sien jy selfs berg Fuji terwyl jy deur die lug tuimel. As jy hou van stap, is die Nakasendo-pelgrimstog tussen Kyoto en Tokio ’n wonderlike uitstappie en ’n geleentheid om twee tot drie dae in die natuur deur te bring. En as jy al die pad na Japan reis, moet jy eenvoudig stede soos Osaka, Kioto en Hirosjima besoek!
WIE SAL JY GRAAG IN DIE EINDSTRYD WIL SIEN SPEEL?
Die grootste tweestryd in wêreldrugby is sonder twyfel die Springbokke teen die All Blacks.