TEGNOLOGIE
Die landboubedryf bevind homself midde-in ’n omwenteling waarin snel veranderende tegnologie ’n al hoe groter rol speel om boere produktiewer te maak, produksiekoste te verminder, tyd te bespaar en winsmarges te vergroot.
Die landbou is midde-in ’n nuwe omwenteling waarin snelveranderende tegnologie ’n ál groter rol speel in produktiwiteit en wins. Die gouepryswenner op die pas afgelope Agritechnica, John Deere se outonome trekker-konsep, is ten volle elektries en kan tot 500 kW lewer.
Benewens die tegnologiese vooruitgang op die pas afgelope Agritechnica naby Hanover in Duitsland, val die kollig al hoe meer op omgewingsvriendelike landboupraktyke en -tegnologieë om in die verbruiker se groeiende eise vir eties geproduseerde produkte te voorsien.
Sowat 3 000 uitstallers en rondom 450 000 besoekers het vanjaar gestroom om die 291 inskrywings te bekyk wat vanjaar vir die Agritechnica-innovasieprys ingeskryf is. Uiteindelik is 39 silwer en slegs een goue medalje oorhandig, wat die pas waarteen tegnologie in die landbou verander, onderstreep.
“Die landbou staar die probleem in die gesig dat dit in die toekoms veel meer voedsel op ’n veel kleiner oppervlak op ’n etiese en omgewingsvriendelike wyse sal moet produseer,” het mnr. Hubertus Mühlhäuser, hoofbestuurder van die megalandboumaatskappy CNH Industrial, gesê.
Mühlhäuser het gesê die enigste oplossing tot dié probleem is om beter en meer gesofistikeerde tegnologie, spesifiek ten opsigte van saad en meganisasie, te ontwikkel en aan te wend. “Tans is daar drie hoofneigings in die landbou. Eerstens is daar die strewe na groter digitalisering en beter skakeling tussen masjiene op plase. ’n Groot hoeveelheid inligting word daagliks versamel en die knelpunt is om dié inligting sinvol aan te wend om die boer uiteindelik te help om die regte besluite op die regte tyd en die regte plek te neem en sodoende doeltreffender te wees.
“Tweedens sien ons ’n groeiende neiging na outomatisering waar minder mense nodig gaan wees omdat masjiene die werk kan verrig. Die landboumasjinerie van die toekoms gaan veel anders lyk as dit waaraan ons gewoond is.
“Laastens word daar na al hoe meer alternatiewe vir dieselenjins gekyk. Elektrifisering, soos dié waarmee John Deere en Joskin vanjaar ’n goue medalje tydens Agritechnica verower het, gaan ’n groter rol begin speel om trekkers en werktuie doeltreffender te maak, terwyl daar ook na alternatiewe brandstofbronne, soos metaangas en waterstofselle, gekyk word.”
Wat Mühlhäuser se laaste punt veral insiggewend maak, is die feit dat CNH Industrial onder meer die enjinvervaardiger FPT Industrial besit en jaarliks sowat 750 000 dieselenjins verkoop.
“Die handel in dieselenjinaandrywing sal moet verander. Alternatiewe moet gevind word. Die landbou het nou die geleentheid om homself te herposisioneer as ’n koolstofverwyderende bedryf. Dit het byvoorbeeld die potensiaal om biomassa te neem, dit in metaan om te skakel en dit uiteindelik in trekkers te gebruik. Ons moet die groter oplossings beklemtoon,” het Mühlhäuser gesê.
ALTERNATIEWE BRANDSTOF SLEEP DIE WA DEUR DIE DRIF
Die soeke na alternatiewe brandstof om die dieselenjin te vervang, het ook na sukses vir New Holland gelei. Die vervaardiger se T6 Methane Power-trekker, die wêreld se eerste produksie-metaantrekker, is as die Volhoubare Trekker van die Jaar 2020 aangewys.
Die T6 Methane Power is die hoogtepunt van New Holland se baanbrekerswerk op die gebied van alternatiewe brandstof deur die maatskappy se Clean Energy Leader-strategie en gee ’n aansienlike tree in die rigting van ’n landboubedryf wat koolstof verwyder, pleks daarvan om dit toe te voeg. Die T6 sal in 2020 te koop aangebied word en bied ekonomiese
en praktiese voordele, waarop daar verbeter word wanneer biometaangas gebruik word.
“Boere sal byvoorbeeld gewasse kan aanplant, dit inkuil en die kuilvoer dan in ’n bioverteerder plaas om die biomassa in metaan om te skakel.
“Sodoende plant jy in die toekoms jou eie brandstof,” het Mühlhäuser gesê.
Die T6 Methane Power bied tot 30% laer werkskoste en in die veld het hy reeds bewys dat hy 99% minder partikel-materiaal as dieselfde soort dieselenjin vrystel.
Boonop is die trekker se vrystelling van CO2 met ’n minimum van 10% minder as ’n dieselenjin en totale vrystellings is 80% laer as dié van ’n soortgelyke dieselenjin.
Die trekker speel ’n sleutelrol in New Holland se energie-onafhanklike plaaskonsep, waar gewasse gebruik word om energie op te wek, wat weer op sy beurt gebruik word om gewasse aan te plant vir ’n CO2-neutrale siklus.
GROEN TOEKOMS
Nog ’n groot trekpleister was John Deere se nuwe Future Technology Zone. Nege verskillende produkontwikkelings in elektrifisering, outonomie deur outomasie en kunsmatige intelligensie, het gewys hoe die landbou volhoubaarder en produktiewer in die toekoms kan wees.
Die maatskappy het ook, met die samewerking van die Belgiese misstrooiermaatskappy Joskin, ’n goue medalje ontvang vir die wêreld se eerste deurlopend-veranderlike ratkas met elektromeganiese kragverdeling, waaronder die verskaffing van elektrisiteit aan die elektriese komponent van ’n werktuig. Dit is ’n splinternuwe konsep en behoort die manier waarop werktuie se elektrisiteit verskaf word, heeltemal te verander.
Vir die nuwe eAutoPowr het John Deere die hidrouliese stelsel in sy geheel met ’n elektriese ontwerp vervang.
Die twee borsellose elektriese motors is so te sê verslytingsweerstandig, terwyl die aandrywingstelsel gebou is om jare se gebruik te bied.
Die ratkas verbeter onder meer die bestaande reeks 8R-trekkers van John Deere se brandstofverbruik en bied ’n fyner snelheidbeheer en beter versnelling.
Vir aangedrewe werktuie en sleepwaens kan die eAutoPowr tot 100 kW elektrisiteit verskaf. eAutoPowr is dus die eerste ratkas wat ’n koste-sensitiewe en doeltreffende elektrifiseringsoplossing vir intelligente trekkerwerktuig-kombinasies bied.
Die trekker-en-tenkerkombinasie vir vloeibare, organiese materiaal se 25,5 m3 tenker is toegerus met twee dryfasse wat deur ’n elektriese motor van 100 kW aangedryf word.
Die dryfas verminder wielglip aansienlik. Die bykomende aandrywing kan ook vir ander werktuie en sleepwaens gebruik word.
Dietegnologielaatbyvoorbeeldkleiner
en ligter trekkers toe om wyer werktuie te sleep. Dit verhoog produktiwiteit, terwyl die aanvanklike kapitaalkoste ook verminder word.
Een van die grootste trekpleisters is die John Deere se outonome trekker-konsep, wat bestaan uit ’n kompakte elektriese aandrywingseenheid met ’n geïntegreerde haak.
Dié trekker het ’n kraglewering van 500 kW en kan met wiele of rusperbande toegerus word. ’n Dinamiese gewigsverspreiding vanaf 5-15 ton, na gelang van die toepassing waarvoor die trekker ingespan word, kan help om grondverdigting te verminder.
Danksy die trekker se elektriese aandrywing is daar ook geen emissies nie en geraasvlakke is uiters laag.
Boonop meen John Deere dat die trekker se onderhoudskoste ook baie laag sal wees.
DIE ROOI TREKKER SONDER BESTUURDER
Hoewel die Case IH Autonomous Concept Vehicle reeds in 2016 bekend gestel is, bly dié eiesoortige trekker besoekers na die groot rooi stalletjie van Case IH lok.
Die trekker is deur Case IH en CNH Industrial se Innovation Group ontwerp, gegrond op ’n bestaande Magnum-trekker in die Case
IH-stal met ’n aangepaste stilering.
Sy werkende interaksie laat die operateur toe om ’n aantal vooraf geprogrammeerde aksies uit te voer. Die trekker se aanboordstelsel maak outomaties voorsiening vir werktuigwydtes en kies die doeltreffendste paaie, na gelang van hindernisse, terrein en ander masjinerie wat moontlik in dieselfde land werksaam kan wees. Die operateur monitor dan die werking van die trekker en kan sy aksies aanpas op ’n rekenaar in sy kantoor of vanaf ’n tablet langs die land.
Gerrit Bezuidenhout se besoek aan Hanover is moontlik gemaak deur die Duitse landbouvereniging DLG.