DANKIE VIR OPBOUENDE SIMPOSIUM
Landbouweekblad en Witzenberg-PALS se grondsimposium op Ceres vroeër vandeesmaand is deur meer as 400 mense van reg oor Suider-Afrika bygewoon. Goeie terugvoer daaroor is ontvang — self in die parlement. Hier is enkele van die kommentaar. Meer sal in die volgende uitgawe gepubliseer word.
LIZBÉ BESTER, Sarel Bester Ingeniers, Ceres, skryf: Ons wil net graag van ons kant af die
Landbouweekblad-span bedank vir ’n pragtige, opbouende dag. Dit is uitgebasuin: Ons kán en ons wíl! Dankie dat julle die spreekbuis was. Welgedaan. Die simposium was baie goed gereël en fyn afgerond. Daar moes baie werk daarin gegaan het. Ek hoop ons kan weer iewers in die toekoms saamwerk.
H.J. NICHOLLS EN KINDERS, Ceres, skryf: Hiermee wil ons u en alle betrokkenes bedank wat die simposium moontlik gemaak
het. Ons kon ons vereenselwig met die waardevolle lesse wat die sprekers geopenbaar het, asook die oplossings wat meegedeel is. Dit was vir ons as maatskappy ’n baie groot en emosionele oomblik om namens ons pa erkenning te kry vir meer as vyftig jaar se harde werk, ongeag die omstandighede van die verlede. Soos die sertifikaat inderdaad beskryf: “In sosiale harmonie” in besigheid met almal. Ons waardeer die gebaar van waardering deur Landbouweekblad en PALS en streef daarna om in ons pa se voetspore te volg.
JOHANNES MARIO JACOBS skryf op Facebook: Ek sou wat wou gee om die simposium te kon bywoon. Ek het in die Koue Bokkeveld grootgeword met landboukunde en landbouwetenskap as skoolvakke en is al 20 jaar lank by die sagtevrugtebedryf betrokke. Ek begin nou self boer. Ek sou beslis baie nuttige inligting daar kon versamel. Sal die besprekings dalk ná die simposium iewers beskikbaar wees?
(Die voorleggings sal binnekort op Landbou.com geplaas word.