KOOPBRIEWE MOET BOERE HELP DEURHAAL

WES-KAAPSE boere in die droogtegeteisterde distriksmunisipaliteite Sentraal-Karoo, Klein-Karoo en Matzikama kon die afgelope weke danksy noodbystand van R50 miljoen van die provinsiale regering met koopbriewe voer vir hul diere by koöperasies bekom.

Dr. Ivan Meyer, Wes-Kaapse minister van landbou, het onlangs die Matzikama-distrik besoek en boere by die Aan-DeKleinrivier-padstal op Vredendal toegespreek, waarna hy van dié koopbriewe oorhandig het.

“Ondanks die ergste droogte in 100 jaar het die landbouproduksiewaarde in die Wes-Kaap verlede jaar R43 miljard beloop. Boonop was daar regstreekse beleggings van R4 miljard in die landbou ondanks die droogte in 2017. Die eerste ses maande vanjaar het ons R350 miljoen alleenlik in die Wes-Kaap gesien. Dit wys mense hét nog hoop en vertroue in die landbousektor.”

DRINGENDE SAAK

Ondanks die goeie nuus sien Meyer daagliks die nood weens die droogte. Boere kan nie meer wag vir droogtehulp van die nasionale regering nie. “Daarom het ek die Wes-Kaapse regering versoek om dringend droogtehulp van R50 miljoen beskikbaar te stel vir boere in die Sentraal-Karoo, Klein-Karoo en Matzikama.

“As ek tot Desember gewag het, was dit dalk te laat. Die pre

sident moes al lankal ’n landbounoodtoestand in Suid-Afrika afgekondig het.”

Meyer het gesê hy het die nasionale tesourie byna drie maande gelede skriftelik versoek om droogtehulp van R147 miljoen. “Hierdie R50 miljoen van die Wes-Kaapse regering sal ons net tot Desember hou. Januarie tot Maart is net sulke belangrike landboumaande.

Volgens mnr. Daniel Johnson, Meyer se woordvoerder, het die departement geen reserwefondse beskikbaar nie, maar doen wat hy kan om nog ’n maand se steun te verseker terwyl hy met die owerhede skakel vir nog hulp.

VERWOESTYNING

Meyer het saam met mnr. Eric van Zyl, voorsitter van die Vredendal-landbouvereniging en lid van Agri Wes-Kaap se jongboer

komitee, besoek afgelê by kommersiële en opkomende boere op plase by Langdrift en Kwaggaklip naby Bitterfontein.

Meyer het gesê die Wes-Kaapse regering het vroeër ’n veldassesering gedoen en dit lyk nie goed nie. Dit het hom oortuig om die omgewing te besoek en sy hulp en ondersteuning aan te bied.

Volgens hom sal dit vyf jaar duur vir die grond om te herstel. “Hier woon mense wat baie veerkragtig is, maar klimaatsverandering saam met die droogte het ’n permanente letsel op die Knersvlakte gelaat. Dit lyk of dit in ’n woestyn gaan verander.”

Van Zyl het gesê Agri Wes-Kaap is dankbaar vir die minister se belangstelling. Hy het voorspel dat 2020 ’n goeie jaar gaan wees. Die dele in die distrik wat die ergste onder die droogte gebuk gaan, is die omstreke van Kliprand, Langplaas en Bitterfontein. Probleemdiere veroorsaak ook groot skade.

‘Die president moes al lankal ’n landbounoodtoestand in Suid-Afrika afgekondig het.’