RHODES FOOD GROUP | Swakker rand help in moeilike jaar
’n Swakker rand het wind in die seile van Rhodes Food Group (RFG) se buitelandse verkope gesit.
In die boekjaar tot einde September het die rand met gemiddeld 7,7% teruggesak teenoor die geldeenhede van RFG se vernaamste uitvoermarkte. Hoe goedkoper die rand, hoe meer wins word in randwaarde met verkope in die buiteland verdien.
Dié genoteerde voedselmaatskappy, Suid-Afrika se voorste vervaardiger van blikkiesvrugte, konfyt en blikkiesvleis, se bedryfswins het met 24,9% tot R392,2 miljoen gestyg teenoor ’n jaar gelede.
Die omset is 8,5% hoër, en die wesensverdienste per aandeel het met 33,3% tot 84c gestyg.
Robuuste verkope in Afrika,
vroeë tekens van herstel in internasionale verkope buite Afrika en groter winsmarges het tot die prestasie bygedra, sê mnr. Bruce Henderson, uitvoerende hoof van RFG in ’n verklaring.
Die droogte wat in 2017-’18 in die Wes-Kaap geheers het, het in die vorige boekjaar ’n ongunstige invloed op RFG se syfers gehad, maar dié prentjie lyk nou beter. Volgens die maatskappy het die swakker gehalte van die vrugte wat in die eerste helfte van die boekjaar ingemaak is, wel sy wins benadeel.
Die verkope van RFG se afdeling vir vars voedsel, wat onder meer voorbereide maaltye vir Woolworths verskaf, het met 7,3% gegroei. Die omset van langlewevoedsel het met 9,2% gestyg, veral te danke aan groei in die volume blikkiesvrugte en -vleis, asook vrugtesappe.
Die maatskappy beoog kapitaalbeleggings van R150 miljoen in die volgende boekjaar nadat hy R231,5 miljoen aan ontwikkelings en opknappings in die boekjaar tot einde September vanjaar bestee het.
Henderson sê die groep verwag om sy huidige groeimomentum te behou, veral danksy die herstel op sy internasionale markte. Hulle begin in die komende boekjaar met die uitvoer van vrugteversnaperings in klein houers na Amerika, en na verwagting gaan verkope van blikkiesvrugte styg.
— VIDA BOOYSEN