Nog geen oplossing in stryd teen stompkopkewer

’N TEENVOETER is nog nie vir die stompkopkewer gevind nie en die besmetting vererger waarskynlik, sê dr. Francois Roets van die departement bewaringsekologie en entomologie aan die Universiteit Stellenbosch.

Roets was lid van die span wat vroeër vanjaar bevestig het dat die kewer wat in SomersetWes in die WesKaap opgemerk is, wel die stompkopkewer is.

Hy sê dié besmettings kom sporadies voor. ’n Paar middels word getoets om te bepaal of dit doeltreffend teen die kewer sal wees, maar het tot dusver nog nie goeie resultate gelewer nie.

“Verskeie instellings toets produkte. Dit lyk asof die Stad Kaapstad sukses behaal met prosesse om besmette bome te verwyder. Talle bewusmakingspogings is aan die gang om mense te keer om besmette hout te versprei.”

Hy sê agt universiteite in SuidAfrika het verskeie studies saam aangepak om aspekte van die plaag se eienskappe, verspreiding, impak en bestryding na te vors.

Roets sê die stompkopkewer

kom landwyd voor, maar in geisoleerde gebiede. “Die kanse is groot dat dit in gebiede voorkom waar daar nog nie intensief daarna gesoek is nie.”

WYDVERSPREID

Me. Andrea Rosen, medevoorsitter van die Johannesburg Urban Forest Alliance (Jufa), sê baie lede het al besmettings aangemeld. “Gegrond op ondersoeke in die gebied rondom Craighall Park, Parktown North, Craighall en Parkhurst is meer as 1 000 bome met die stompkopkewer besmet. In talle strate en parke is die meeste bome besmet. Op een private eiendom waar ek self ’n inspeksie gedoen het, is daar 11 besmette bome.”

Sy sê hoewel die parkeendieretuinafdeling van die Johannesburgse munisipaliteit volhou dat die stompkopkewer slegs in agt wyke in die stad voorkom, meld inwoners van verskeie ander wyke besmettings by Jufa aan. Prof. Wilhelm de Beer van die instituut vir bosbou en landboubiotegnologie aan die Universiteit van Pretoria het al besmettings in Soweto bevestig.

Rosen sê Jufa stem met kenners saam dat die stompkopkewer nie uitgeroei sal kan word nie. “Die verspreiding daarvan moet beperk word. As ’n teenvoeter daarvoor gevind word, sal dit moontlik nie ’n ekonomiese of omgewingsvriendelike oplossing bied nie. Die behandeling sal net vir spesifieke gashere gebruik kan word.”