VERANDER BELEGGINGSMETODES OM AFRIKA TE LAAT GROEI
GEBREKE in die finansieringsmetodes vir die landbou in Afrika is op die onlangse landboubeleggingsindaba uitgewys as ’n groot belemmering vir landbou-ontwikkeling op die vasteland.
Me. Anne GithukuShongwe, verteenwoordiger van die Verenigde Nasies (VN) se vrouekantoor in Suid-Afrika, het op die beraad gesê dit is moeilik vir klein ondernemings om toegang tot finansiering in Suid-Afrika te kry. Volgens haar is dit omdat die land nog op ’n ou manier van finansiering, soos banke, staatmaak. “Dit is ietwat makliker in ander lande.”
In Ethiopië word gekyk na effekte en in ’n land soos Rwanda word selfs psigometriese toetse pleks van kollateraal gebruik om finansiering te bied.
Luidens die jongste publikasie van die VN se Voedsel- en Landbou-organisasie, Agripreneurship across Africa, is ’n tekort aan finansiering – aanvangskapitaal en beleggings in infrastruktuur en toerusting – van die groot struikelblokke vir landbou-entrepreneurs. Dit is ondanks hul belangrike rol in die ontwikkeling van voedselstelsels.
TEKORTE
Luidens die verslag ondervind landbou-ondernemings op die vasteland ’n finansieringstekort van $11 miljard (R163 miljard) om landbou-uitsette uit te brei. Groot tekorte in finansiering vir bedrywighede soos landbouverwerking, logistiek en handel is ook algemeen.
Die tekort aan toegang tot finansiering beperk nuwe sakegeleenthede, vernuwing en moontlikhede vir opgradering.
Mnr. Ben Leyka, uitvoerende hoof van die landbouraad vir Afrika, het gesê om die ekonomie van Afrika suid van die Sahara te kan transformeer, het die landbousektor agt keer meer kunsmis, ses keer meer verbeterde saad, beleggings van minstens $8 miljard (R119 miljard) in basiese opbergingsgeriewe en $65 miljard (R965 miljard) vir besproeiing nodig.
Verdere beleggings is ook nodig vir basiese infrastruktuur, soos paaie, hawens, energie en verbeterde streekshandel.
Na verwagting sal kosinvoer in die komende jare verdriedubbel.