SPINNEKOPPE VAN DIE KAROO BEKYK
Navorsers wat betrokke is by die Karoo BioGap-projek het ’n besonderse groep spinnekoppe in die oog: die streek se valdeur- en bobbejaanspinnekoppe. In die proses het hulle reeds voorheen onbeskryfde genera en spesies gevind.
Me. Shannon Mitchell, ’n dierkundestudent aan die Universiteit van Pretoria (UP), het nege tot 12 nuwe spesies kurkdeksel-spinnekoppe van die genus Stasimopus ontdek.
Die skuilplekke van hierdie gespesialiseerde spinnekoppe word met ’n dik valdeurdeksel bedek. Die spinnekoppe hou dit danksy stekels op hul bene toe. Die geslote deksel is gewoonlik goed verdoesel en dus baie moeilik om te vind.
Op sy beurt het dr. Duniesky RíosTamayo ook ’n aantal nuwe genera en spesies valdeurspinnekoppe gevind. Hy is tans besig om hulle te beskryf. Ríos-Tamayo is van die Argentynse navorsingsinstituut Consejo Nacional de Investigaciones Científicas y Técnicas en is tans ’n nádoktorale genoot by die Landbounavorsingsraad (LNR).
Hul werk is deel van die Karoo BioGap-projek, ’n nasionale inisiatief tussen ’n klomp instellings waardeur inligting ingesamel word oor watter plante, diere en ander organismes in die Karoo voorkom.
Kennis oor die plante, diere en ander organismes van die Karoo is beperk. Daarom is ’n nasionale navorsingsprogram, soos Karoo BioGap, van groot belang.
’n Toename in landboubedrywighede en die moontlike ontginning van skaliegas deur hidrobreking stel die Karoo se delikate ekostelsel in gevaar. Dis daarom belangrik om te weet watter verskeidenheid diere en plante tans in die Karoo voorkom sodat bepaal kan word watter invloed hierdie veranderinge kan hê.
Me. Robin Lyle, groepleier vir spinnekoptaksonomie by die Karoo BioGap-projek, sê dat basisinligting noodsaaklik is om te bepaal watter risiko’s kwesbare organismes raak.
Veranderinge aan hul natuurlike omgewing kan hul voortbestaan beïnvloed. Deur die navorsingsprojek word gehoop om genoeg wetenskaplike inligting in te samel waarmee beleidmakers ingeligte besluite oor omgewingsbestuur kan neem.
Navorsers weet reeds van tien families, 28 genera en 281 spesies van valdeur- en bobbejaanspinnekoppe in Suid-Afrika. Die nasionale versameling van aragnida (NVA) by die LNR-Plantbeskerming huisves ’n groot getal spesies van dié diverse groep, maar volgens alle aanduidings is daar heelwat spesies wat nog beskryf moet word.
As deel van die Karoo BioGap-projek werk navorsers van die LNR, UP en die Suid-Afrikaanse Nasionale Biodiversiteitsinstituut saam om die gapings in hul kennis aan te vul.
Valdeurspinnekoppe leef in tonnels wat met sy uitgevoer is en wat in die grond ingegrawe word. Die wyfie bring gewoonlik haar hele lewe in haar nes deur en verlaat dit net om prooi te jag.
Mannetjies wat gereed is om te paar, sal ook hul tuiste verlaat om ’n wyfie te soek.
Die klein spinnekoppies wat uitbroei, verlaat die wyfie se nes sodra hulle oud genoeg is. Hulle sal dan ’n paar meter verder hul eie tonnels grawe.
Besoek https://tinyurl.com/y2xrfeqh vir nog inligting oor die Karoo BioGap-projek.