MICROSOFT STEL LANDBOUTOEPASSING IN SA BEKEND
Die sagtewarereus Microsoft het op die landboubeleggingsindaba vir Afrika sy dataproduk Azure FarmBeats bekend gestel.
Dié tegnologie bied boere toegang tot kunsmatige intelligensietoepassings wat kan help om datagedrewe besluite te neem om opbrengste te verbeter, koste te verlaag en die omgewingsimpak van landbouproduksie te verminder, sê mnr. Asif Valley, hoof van Microsoft se Cloud-ontwikkelingspan, wat die produk ontwikkel het.
“Ons glo dat data, tesame met die boer se kennis en instink oor sy of haar plaas, produktiwiteit kan verhoog en koste kan verlaag. Dit is egter moeilik om data van die plaas te kry, aangesien daar dikwels nie krag in die veld of internet op plase is nie.
“As deel van die FarmBeats-projek bou ons verskeie unieke oplossings om hierdie soort probleme op te los deur die gebruik van laekostesensors, hommeltuie en algoritmes.”
Valley sê een oplossing is om die ongebruikte frekwensies in TV-uitsaaibande (wit spasie) te gebruik om sensors koordloos te verbind en die data vas te vang. Met masjienleer-algoritmes word data wat van die sensors verkry is, geïntegreer met ander toepaslike data, soos die weer, gewasvoorspellings en beste praktyke.
Dit kan boere inlig oor wat hulle moet doen, soos wanneer om te plant, hoeveel water om te gee en wanneer kunsmis toegedien moet word.
Volgens Valley word dit alles gedoen teen ’n breukdeel van die koste van bestaande oplossings.
Die toepassing is by bit.ly/2O25MBx te koop. Daar is ook ’n gratis aanlyn sakeskool wat mense touwys maak oor kunsmatige intelligensie (bit.ly/2r9fBEH).