Snysels (Slinger-om-diesmoel) met kaneeltameletjie

(E.J. Olivier, Feed the Lions, Somerset-Wes se Lionsklub, 1967)

Min dinge sê trooskos soos tradisionele melkkos en kaneelgeure. Dit is dalk ’n eenvoudige aandgereg, maar om die snysels te maak is ’n kuns. Kerf jy dit nie mooi nie, wurg dit jou – vandaar die naam slinger-om-die-smoel. Die gekapte tameletjie met sy ou speserygeure is ’n nuwe manier om krakerigheid te gee.

250 ml koekmeel

15 ml botter

Knippie sout

750 ml melk, plus bietjie ekstra 1 pypkaneel Kaneelsuiker, vir strooi

Neem die ongesifte meel en vryf die botter daarin met ’n knippie sout. Maak dit met ’n bietjie melk aan tot ’n stywe deeg. Rol dit baie dun uit, sowat 3 mm, strooi meel liggies oor en rol op. Kerf dit baie fyn met ’n skerp mes of skeermeslemmetjie (die beste manier is op die agterkant van ’n bord effens skuins teen die rand). Kook die melk met die pypkaneel in ’n kastrol, voeg die snysels liggies by. Kook tot die melk drie keer opkom. Die snysels is gaar as dit begin dryf. Sit voor met ’n bietjie kaneelsuiker of die kaneel-en-vanieljetameletjie. Kaneel-en-vanieljetameletjie

110 g strooisuiker

5 ml fyn kaneel

5 ml vanieljepasta

Voer ’n bakplaat met aluminiumfoelie uit. Plaas die strooisuiker in ’n pan oor hoë hitte; kook dit terwyl jy die pan kantel vir 3-4 minute of tot goudbruin. Voeg die kaneel en vanielje by en kantel tot dit gemeng is. Giet die warm mengsel in die bakplaat (dit sprei sowat 20 x 20 cm). Laat staan vir 30 minute om te stol. Breek die mengsel op in ’n stamper en vysel en strooi oor die opgeskepte snysels. Lewer 4 porsies.