GROOT VRAAG NA DRAGTIGE STOETKOEIE
Dragtige Limousinstoetkoeie en -verse was vanjaar goed in aanvraag met pryse wat wissel van R15 000 tot R50 000. “Kopers is bereid om ekstra vir goeie teelmateriaal te betaal,” sê mnr. Martin van Rooyen, rasbestuurder van die SA Limousintelersgenootskap. Meer as 220 vroulike diere is vanjaar op veilings verkoop.
Hy sê die vraag na geregistreerde bulle vir kommersiële gebruik het vanjaar sterk toegeneem. Pryse vir dié bulle wissel van R30 000 tot R50 000 en dit kan toegeskryf word aan die premie wat voerkrale betaal vir Limousin-kruiskalwers.
“Die groot internasionale genepoel bied talle opsies – Limousins is die grootste vleisbeesras in Europa en dele van Australië, terwyl die ras ook besig is om in gewildheid toe te neem in Noorden Suid-Amerika.”
Van Rooyen sê die ras se gewildheid styg beslis. Uitstekende Limousinveilings het vanjaar landwyd plaasgevind. Die hoogste prys wat ’n bul behaal het, was R300 000.
Heelwat stoetbulle het meer as R50 000 op veilings behaal. “Sowat 100 bulle is in 2019 op veilings wat onder die beskerming van die genootskap plaasgevind het, verkoop.”
Hy meen beproefde teelmateriaal sal altyd goeie pryse oplewer. “Kopers besef die waarde van goeie kommersiële Limousins. Ons het talle dinamiese jong telers wat alle beskikbare moderne tegnologie gebruik in hul kuddes, terwyl gehalte-semen vanoor die wêreld ingevoer word vir embriospoeling.”