Neutdroogplan bespaar 65% energie

’n Boer maak ’n plan, en ’n ingenieur twee. Kleiner boere kan nou makadamianeute in vraghouers droog — teen ’n baie laer temperatuur as tradisionele droërs, wat ’n energiebesparing van 65% meebring.

Een van die moeiliker aspekte van makadamiaproduksie is die feit dat die neute gedroog moet word voordat ’n mens dit kan bemark. Tot onlangs was dit hoofsaaklik groot kommersiële boerderye en verwerkingsaanlegte wat dit kon bekostig om droogoonde te installeer.

Nou het ’n meganiese ingenieur van Durban ’n plan beraam wat dit ook vir kleiner boere bekostigbaar gaan maak om hul neute self te droog en te bespaar op die drogingskosneute te wat verwerkers op gelewerde neute hef.

“Ons is baie opgewonde oor die resultate wat ons plaasproewe van ons DryMac-stelsel opgelewer het,” sê mnr. Adrian Padt, uitvinder van die DryMac en eienaar van die maatskappy Rocket Works. Sy stelsel kombineer verkoelingstegnologie met ’n hittepomp vir droging. Dit maak dit moontlik om ’n enkeleenheid te bied wat neute droog en dan kan verkoel om dit op te berg. Hierdie tegnologie bied ’n energiebesparing van tot 65%. Die resultate van die gidsprojek het gewys kan teen 28 ºC gedroog word. Dit is 4-10 ºC koeler as tradisionele droogoonde wat gewoonlik elektriese elemente en groot waaiers gebruik. Die risiko dat hoë droogtemperature die neute se gehalte kan benadeel, is dus aansienlik laer.

OOK VIR VERKOELING AANGEWEND

Padt bou sy stelsel in standaard- verkoelde vraghouers wat algemeen gebruik word waar produkte in klimaatbeheerde toestande vervoer moet word. Die DryMac word vervaardig om met makadamias in kratte te werk. Dit is maklik om te vervoer en eenhede kan selfs op mekaar gestapel word wanneer ruimte beperk is.

Padt sê hoewel hy tans op die makadamiabedryf konsentreer in sy bemarking van die DryMac, kan dit ewe maklik gebruik word om ander produkte, soos mango’s, te droog.

Dit kan ewe maklik omgeskakel word om vrugte en groente te verkoel. “’n Mens kan dit in die makadamia-oestyd as droogoond gebruik en die res van die jaar vir verkoeling.”

Die eenheid kan ook maklik tussen plase vervoer word.

Die makadamiadroër word in ’n vraghouer gebou, kan maklik vervoer word, en houers kan selfs op mekaar gestapel word waar nodig.

Boere kan kies tussen ’n omboude 6 m-vraghouer of ’n 12 m-houer vir ’n drogingsvermoë van onderskeidelik 20 m3 en 40 m3 per eenheid.

Mnr. Adrian Padt, ’n KwaZulu-Natalse ingenieur wie se maatskappy, Rocket Works, bekend is vir houtbrandstowe, maak nou ook ’n dubbeldoel-droogoond vir makadamiakwekers. Dit kan ook as ’n koelkamer gebruik word.