’n Vaardigheid vir Kersfees
Wat gaan jy vir jou kinders onder die Kersboom sit? Speelgoed en sporttoerusting wat kortstondig vreugde verskaf en dan stof opgaar? Maak vir hulle ’n bankrekening oop en bemagtig hulle vir die res van hul lewens.
Verlede jaar het ons gesin ál ons Kersgeskenke deur ’n internetverskaffer gekoop en, soos sy naam aandui, het hy ’n klomp van ons geld gevat. Ek moet sê die koerier se aflewering van die aankope het byna meer opwinding veroorsaak as die oopmaak van die geskenke op Oukersaand. Maar nou, byna ’n jaar later, het ek besef hoe min van die geskenke nog gebruik word.
Die duur hardloopskoene is twee maande lank gebruik voordat die oefenfase ’n stille dood gesterf het. Nou lê die skoene vergete in ’n kas. Ouboet se sonbril is stukkend getrap en kleinsus se geskenke en teddie lê iewers in ’n laai – sy het sedert Januarie nog nie weer daarmee gespeel nie.
Dit laat my wonder of ons werklik die meeste genot vir ons gesin verskaf deur ’n klomp geskenke te koop. Gelukkig het daar in Mei iets gebeur wat my die oplossing vir hierdie Kersfees gegee het.
My dogter het ongeveer R1 000 kontant van Oupa en Ouma en die res van die familie gekry vir haar tiende verjaardag. Ons het besluit om dit saam met die geld in haar spaarvarkie te neem en ’n spaarrekening by ’n bank te open. Sy het ’n bankkaart ontvang en haar eie profiel op my banktoepassing. Dit het ’n verstommende verskil gemaak.
In die eerste week van elke maand kom vra sy hoeveel rente die bank tot haar rekening toegevoeg het. As sy geld van die tandemuis kry of haar weeklikse sakgeld, hardloop sy dadelik na my toe. Ek kry dan die kontant en word verplig om dadelik geld van my bankrekening oor te dra na haar rekening. Die opwinding wanneer sy die SMS ontvang wat sê die geld is inbetaal, is wonderlik.
Sy het gou besef daar gebeur twee dinge wanneer sy iets met haar eie geld koop: Sy kry ’n SMS wat sê “haar geld is nou weg”, en aan die einde van die maand is haar rekening nie meer so groot nie. Baie gou het die saldo in haar bankrekening begin om aan haar ’n baie beter vermoë te gee om die waarde van geld te verstaan. Alles se prys word nou bereken volgens hoeveel daarvan sy met haar banksaldo kan koop. Sy het ook besef dat die waarde wat ander op ’n produk plaas, nie noodwendig dieselfde waarde het as wat sý daarop plaas nie.
Sy het al hierdie vaardighede geleer deur ’n bankrekening oop te maak. (Sy het ook geleer om haar pa te oortuig om namens haar vir dinge te betaal.)
Omdat dit so goed gewerk het, het ons vir haar ’n effektetrustbelegging oopgemaak. Ons het verduidelik die fonds belê in maatskappye en dat sy dus een van daardie ondernemings se eienaars is. Elke keer as daardie maatskappye geld maak, word haar geld meer. Ons het vir haar ’n lys gegee van die toptien maatskappye waarin die fonds belê. Die gevolg was dat ek van selfoonverskaffer én kruidenierswinkel moes verander! Toe ek onlangs in die hospitaal opgeneem is, wou sy weet hoekom ek nie in “haar” hospitaal bly nie.
As ’n finansiële beplanner is dit elke keer ’n skok as ons met finalejaar-regs- en mediese studente gesels en besef hulle verstaan glad nie hoe geld werk nie. Dit is studente wat binne ’n paar weke begin werk en ’n salaris gaan verdien. Geen wonder nie dat so baie nuwe werknemers reeds binne drie jaar diep in die skuld is.
Deur vir my dogter ’n bankrekening oop te maak en ’n belegging te gee, het sy nie net die waarde van geld geleer nie, maar ook sake en die ekonomie ’n klein bietjie beter leer verstaan. Hierdie vaardighede gaan ’n verskil in haar toekoms maak.
Ek weet wat sy vanjaar vir Kersfees gaan kry. Miskien moet ons almal hierdie Kersfees daarop klem lê om ons kinders ’n bietjie meer geldwys vir die toekoms te maak.
My dogter wou weet hoekom ek nie in ‘haar’ hospitaal bly nie.
Adv. Ronald King is hoof van strategiese navorsing by PSG.