Vra vir Faffa
Wat is die beste planter en vestigingsmetode vir bloubuffel- en borseltjiegras?
Albei gewasse moet in ’n ferm, goed voorbereide saadbedding geplant word. Ploeg die grond 200 mm tot 300 mm diep in die herfs van die vorige jaar of so vroeg moontlik in die seisoen waarin daar geplant moet word. Kalk, indien nodig, kan dan toegedien en ingeploeg word.
Die grond moet voortdurend liggies met ’n skottelploeg bewerk word om vog te bewaar, onkruid te bestry en ’n bevredigende saadbedding voor te berei. Die saadbedding moet teen planttyd fyn, kompak en sonder onkruid wees. Superfosfaat kan voor die laaste bewerking gestrooi en in die grond ingewerk word om die fosforinhoud van die grond tot ongeveer 15-20 mg/kg te verhoog.
Ryplanting word sterk aanbeveel en saad moet goed vasgetrap word. Dié metode is raadsaam in gebiede met ’n laer reënval of produksiepotensiaal. Die afstand tussen die rye kan volgens omgewingstoestande wissel. In ’n gebied met ’n jaarlikse reënval van 400 mm tot 450 mm kan die spasiëring tot 2 000 mm wees, en by gebiede met 600 mm-reënval of hoër gaandeweg tot 600 mm vernou word.
Vir ryplanting kan ’n mielieplanter, die trekkerwielmetode of die spesiaal ontwerpte bloubuffelplanter gebruik word. Moenie die saad dieper as 5 mm bedek nie, dit sal ontkieming vertraag en vestiging benadeel.
Die trekkerwielmetode word gedoen deur afleipype (plastiekrioolpype of geut-afleipype) vertikaal voor die agterwiele van ’n trekker (reg in die voorwielspoor) te monteer. ’n Persoon op elke modderskerm strooi die saad deur die pyp, in die voorwielspoor. Die agterwiel trap die saad dan stewig vas.
Die afstand tussen die trekker se twee wiele is normaalweg 1,2 m. Nouer rye kan bewerkstellig word deur wydsbeen oor die oorspronklike twee rye te beweeg. Daar is ook al heelwat verbeterings op die trekkerwielmetode, soos die aanbring van planterbakkies op die trekker wat deur ’n klein motortjie aangedryf word, om die saad egalig in die spoor te strooi.
In baie gevalle word die trekker gebruik om eers ’n spoor te trap en die saad met die hand daarin te strooi, en dan weer die saad met die trekker vas te trap.
Prof. Chris Dannhauser is ’n onafhanklike veld-en-weidingsbestuurspesialis.