100 jaar se gemeenskapsresepte
As dit nie vir souttertresepte was nie, sou vele gemeenskapsboekies heelwat dunner gewees het. Die vroue het soutterte gemaak met alles wat in hulle is, en met alles in die yskas en die spens. Dit is glad nie ongewoon om resepte te sien met name soos Souttert I, Souttert II of Souttert III nie, en dan is daar nog ’n rits vir korslose soutterte wat omtrent almal identies is. Dink aan die intriges en politiek van so ’n boekie saamstel – wie se resepte laat jy uit sonder om op tone te trap?
Me. Maaike M. Jooste van Boston het soutterte netjies ingeskryf op oop spasies in Beproefde Resepte. Dit is deel van die drie-reeks-boekies wat die sustersvereniging van die NG kerk Bellville-Oos van 1960 af saamgestel het.
Aartappelkors
500 ml warm kapokaartappels ■
55 g botter
10 ml bakpoeier
2 groot eiers, geklits Vulsel
15 g botter
15 ml koekmeel
250 ml warm melk
1 eier, geklits
5 ml sout
15 ml gekapte, vars pietersielie Knippie rooipeper
180 ml gerasperde cheddarkaas Keuse van gekapte ham, skyfies weense worsies, soutvleis, ingemaakte aspersiepunte, gekapte hardgekookte eier, gekapte gaar streepspek, gerookte snoek Bolaag
1 eier
125 ml melk
60 ml gerasperde cheddarkaas
Voorverhit die oond tot 180 °C. Smeer ’n tertbak met ’n deursnee van ongeveer 20 cm.
Aartappelkors: Meng die warm aartappels met die botter. Voeg die bakpoeier en geklitste eiers by en meng. Voer die voorbereide tertbak met die aartappelmengsel uit.
Vulsel: Maak ’n witsous: Smelt die botter in ’n kastrol en roer die meel by. Sodra dit effe verbruin, voeg die helfte van die warm melk by, roer wild en wakker tot glad en klontvry. Voeg die res van die melk by en roer tot die sous verdik. Voeg die res van die bestanddele by en giet die mengsel in die aartappelkors.
Bolaag: Klits die eier en melk goed saam en giet dit oor die vulsel. Strooi die kaas oor en bak 20–30 minute tot gaar.
Lewer 1 middelslag-souttert.