Dohne-Merinotelers se prestige-ramveiling afgestel
DIE Dohne-Merinotelersgenootskap van Suid-Afrika het sy nasionale prestige-ramveiling, wat jaarliks in die derde week van Februarie in Bloemfontein plaasvind, afgestel. Die besluit is geneem ná dr. Mpho Maja, hoof van die departement landbou se afdeling dieregesondheid, gelas het dat die veiling met vier tot ses weke uitgestel word.
“Die praktiese uitwerking van dié maatreël sou wees dat die topteelmateriaal van die veiling nie in die huidige paarseisoen beskikbaar sou wees nie,” sê dr. Kobus Delport, die genootskap se rasdirekteur.
Die veiling is vroeër goedgekeur op grond van reëlings om die diere onder kwarantyn te hou vir 28 dae ná die byeenkoms, voor hulle vervoer word. Toestemming is ook vyf weke voor
die beplande veilingsdatum, 18 Februarie, van die provinsiale veeartesnykundige owerhede verkry. Lees meer by http://bit. ly/2V8w0q7.
ONDERSOEK
Intussen oorweeg die staat strafregtelike klagte in verband met die verbod op die samekoms van gespletehoefdiere ná ’n veiling in die distrik Bultfontein.
Mnr. Reggie Ngcobo, woordvoerder vir me. Thoko Didiza, minister van landbou, landelike ontwikkeling en grondhervorming, sê die omstandighede en vervoer van 566 stuks vee wat op die plaas Electie van mnr. Ikus le Roux verkoop is, word ondersoek. Die diere moes 28 dae op die plaas vertoef voor dit na die nuwe eienaars vervoer kon word.
Volgens veilingskennisgewings van Liba, wat die veiling aangebied het, is net een verkoper se diere aangebied en streng maatreëls sou geld, soos die ondersoek van die vee deur ’n staatsveearts en die inspeksie van die kopers se voertuie om die verspreiding van siektes te voorkom. Le Roux kon nie vir kommentaar bereik word nie.
–