Bespreek nóú vir droogtedag op Prieska
SAAM met die boeregemeenskap beraam Landbouweekblad planne om die voortslepende droogte te oorleef, boerderye aan die gang te hou en die agteruitgang van die plattelandse ekonomie te keer.
Om boere en hul gesinne raad te gee, moed in te praat en ’n geleentheid te skep waar boere met mekaar kan praat, hou Landbouweekblad en GWK binnekort ’n tweede droogtehersteldag in die NoordKaap, dié keer op Prieska.
Dit volg op die suksesvolle dag in Januarie op Brandvlei waartydens boeregesinne nuwe planne en moed gekry het en lekker kon saamkuier.
Die droogtehersteldag op Prieska vind op Vrydag 6 Maart in die saal van die Hoërskool Prieska in Van Niekerkstraat plaas.
Kwelvrae waaroor kenners gaan praat, sluit in: Hoe maak ek my boerdery veerkragtiger; hoe gemaak met alternatiewe voerbronne en laegraadse voer; hoe bly ek sielkundig sterk; wat doen die georganiseerde landbou om te help?
Die sprekers is mnre. Llewellyn Brooks, besturende direkteur van GWK; Willem Symington, boer van Williston en adjunk-voorsitter van Agri Noord-Kaap; en Joseph Steyn, boer van Prins Albert wat hom beywer om boere sielkundig sterker te maak.
Anders sprekers sluit in mnre. Clement Cupido, weidingsekoloog van die Landbounavorsingsraad;
Jan Hoon, dierevoedingskundige van die Grootfontein-Landbou-ontwikkelingsinstituut; en Sybrand Venter, boer van Carnarvon wat ’n voeraankopegroep bedryf.
Cupido is lid van ’n span ekoloë en plantkundiges wat die veeweidingsgebiede van die Noord-, Wes- en Oos-Kaap deurkruis om te leer by boere wat goeie veldbestuur toepas. Die inligting gaan gebruik word om weidingsriglyne op te stel.
PLANNE MET VOER
Hoon sal praat oor maniere om laegraadse voer, veral strooi en ander ruvoer, smaakliker en verteerbaarder te maak, asook die moets en moenies van die benutting van alternatiewe voerbronne, soos turksvye, soutbos en prosopis.
Venter het verlede jaar met ’n voergroep begin om gehaltevoer teen bekostigbare pryse vir lede van die groep aan te koop of deur skenkings te werf. Hy sal ook die opnames wat hy doen om syfers aan die uitwerking van die droogte te koppel, bespreek.
Die verrigtinge begin om 09:00 en word net ná 14:00 met middagete afgesluit.
Bywoning is gratis, maar dit is wel nodig om te bespreek. Bespreek teen 27 Februarie deur ’n WhatsApp met jou naam en aantal gaste te stuur na 082 298 9713 of 083 462 4597.