SONNEBLOMDIEWE KOS BOERE MILJOENE
’N STYGENDE misdaadneiging – die diefstal van sonneblomsaad – teister boere in veral Noordwes. Dit het die afgelope paar maande tot miljoene rande se skade gelei.
Net op een nag in Desember is daar by NWK se saaddepot op Lichtenburg 300 sakke sonneblomsaad gesteel. Me. Susan Kemp van die Agricol-agentskap by die depot sê die inbraak was tussen 02:00 en 05:00. Die diewe het verby mieliesaad gestap om sowat 300 sakke sonneblomsaad, wat R2 260/sak kos, te steel.
“Dit lyk of die inbraak haarfyn beplan was en die skade was rondom R700 000. Die diewe moes ’n maklike afsetgebied vir die saad gehad het,” meen sy.
PROBLEEM ÁL GROTER
Mnr. Naudé Pienaar, adjunkhoofbestuurder van Agri Noordwes, sê by Lichtenburg, Gerdau en Sannieshof, asook talle ander plekke, was daar die afgelope drie tot vier maande talle voorvalle van saaddiefstal. Dit raak nou ’n al hoe groter probleem. Hy sê daar was enkele gevalle van mieliesaad wat ook gesteel is, maar die diefstal is veral gerig op sonneblomsaad.
“Ek weet nie of daar nou meer mense met die laat reën juis sonneblom wou plant nie. Dit is ’n maklike ding om te plant en dit verhandel maklik op die informele mark. By informele nedersettings kry ’n mens al hoe meer lappies sonneblom – iets wat ’n mens in die verlede nooit gesien het nie.”
Mnr. Jozeph du Plessis, boer van Schweizer-Reneke en voorsitter van die sojaboon-en-sonneblomforum, het op ’n forumvergadering ook na die saaddiefstal verwys. Hy het gesê in elke distrik is daar seker minstens vier tot vyf boere wat deurloop.
“Die diewe se werkswyse is baie gesofistikeerd. Baie boere het eerder die saad by hul verskaffers gelos tot hulle gereed was om te plant.”
Hy sê sover hy weet, was daar min diefstal van mielie- of sojaboonsaad, maar net in sy eie distrik is minstens 1 000 sakke sonneblomsaad by boere gesteel.