BOER LEER WOOLIES HOE OM MANGO’S TE VERKOOP
DEUR nou saam te werk met die Suid-Afrikaanse Mangokwekersvereniging het die supermarkgroep Woolworths dit reggekry om die verkope van sy heel mango’s jaar ná jaar bestendig te laat groei en oor die afgelope vyf jaar met van 20% tot 30% verbeter. Só sê mnr. Don Thankge, Woolworths se senior tegnoloog in beheer van mangovoorbereiding.
“Suid-Afrika se per kapita verbruik is wel laag vergeleke met lande soos Peru, maar ons is bederf met van die lekkerste vrugte en ’n wye verskeidenheid.”
Hy voeg by verbruikers vind mango’s partykeer ongerieflik om te eet, omdat dit geskil en van die pit af gesny moet word.
Dit is waarskynlik hoekom Woolworths 250 ton klaar gesnyde en verpakte mango’s per week verkoop in die somermaande wanneer die vrugte geredelik beskikbaar is. “Ons het nog nooit gesukkel om die voorafgesnyde produk te verkoop nie, inteendeel, ons enigste probleem is dat verbruikers dit graag 12 maande van die jaar sal wil hê.”
LEERKURWE
Met heel vrugte was daar egter ’n leerkurwe en Woolies het by die kwekers gaan kers opsteek om beter te verstaan hoe mango’s ryp word en wanneer hulle op hul lekkerste is.
“Ons het dit al die jare verkeerd gedoen. Die kwekers het ons gewys hoe lyk ’n mango wanneer hy op sy aantreklikste is vir die verbruiker, hoe om dit reg ryp te maak en hoe om dit te verpak en uit te stal. Dit het die deurslag gegee.”
Thankge sê die grootste probleem in die mangobedryf is waarskynlik mango’s wat te vroeg op die rak geplaas word omdat kwekers en handelaars soveel moontlik munt wil slaan uit die kort seisoen.
“Ons verkoopsyfers het ons geleer dat dít nie die beste benadering is nie.”