KORONAVIRUS BRING ONSEKERHEID IN WOLBEDRYF
DIE dodelike koronavirus wat vanuit China rimpelings deur die wêreldmarkte stuur, behoort nie in die nabye toekoms ’n uitwerking op die uitvoer van Suid-Afrikaanse wol te hê nie. Dit kan egter in die toekoms die geval wees.
Mnr. Isak Staats, bestuurder van wol en sybokhaar by BKB, sê die Chinese regering ondersteun ondernemings om kontantvloei te verseker. Kopers koop steeds en die markte lyk goed.
Daar is egter steeds onsekerheid in die wolbedryf oor wat die uitwerking van die koronavirus kan wees.
Luidens ’n verklaring van die Australiese wolbedryfsekretariaat was werksaamhede by Chinese fabrieke weens beperkingsmaatreëls om te keer dat die virus versprei, teen druktyd nog nie normaal nie.
As gevolg van vervoerbeperkings is die beweging van vragmotors tussen hawens en meulens ’n probleem. Die uitreik van kredietbriewe is ’n knelpunt weens personeeltekorte by banke.
Luidens die verklaring is dit nog te vroeg om te sê watter impak die virus sal hê.
TOEKOMSTIGE IMPAK
Volgens Staats word ongeveer 85% van die wolprodukte wat in China verwerk word, in China verbruik. Dit beteken die eindverbruikmark kan onder druk kom indien die koronavirusuitbreking lank voortduur.
“Dit hang af hoe die Chinese regering sy ekonomie in die algemeen ondersteun. Ek reken dit gaan ’n impak in die toekoms hê, wat goed of sleg kan wees.
“Die Chinese regering is bekend daarvoor dat hy sy ondernemings ondersteun. As die virus regtig in ’n krisis ontaard, is ’n mens egter nie seker nie.”
Mnr. Wandile Sihlobo, landbou-ekonoom by Agbiz, sê die uitvoer van wol het in 2019 met 24% gedaal tot ’n waarde van $302 miljoen. Die hoofrede was dat uitvoer na China met bykans ’n derde afgeneem het nadat China die invoer van Suid-Afrikaanse wol verbied het ná die uitbreking van bek-en-klouseer in Limpopo.
“Daarby het die Chinese aandeel in die uitvoer van Suid-Afrikaanse wol tot die laagste vlak in nege jaar gedaal (55%).”
Sihlobo wys op groei in die uitvoer na Tsjeggië, Italië, Indië en Bulgarye. “Dit is egter klein markte. China bly een van die belangrikste markte vir wol.
“China het in 2018 in volume ongeveer die helfte van die wêreld se wol ingevoer, wat meer as die helfte was wat waarde betref.”
REGSTELLING
Volgens Staats is die huidige markpryse laer en is daar ’n regstelling ná die rekordhoë pryse wat in die 2018-’19-seisoen behaal is.
Hy twyfel of die verliese van 2019 vanjaar verhaal sal word.
Boonop is daar onsekerheid in die wolbedryf omdat Australiese wolproduksie volgens Staats verklein het. Die uiteindelike uitwerking van die droogte is ook nog nie in Suid-Afrika se lewering gesien nie.
Staats sê daar is wel baie navrae oor wol, en hy voorsien nuwe ontwikkelinge binne die volgende jaar of twee.
Hy moedig boere in die huidige toestande aan om hul wol volgens volhoubare standaarde te laat sertifiseer omdat dit die toekoms vir die wolbedryf is. Daarby is die marges nou laer, “dus is die ruimte vir foute min en jy moet die regte dinge doen”.
BETER PRYSE
Met die meeste produksieveilings vir wolskape wat tans in volle gang is, is pryse beter as verwag.
“Die gemiddelde prys is ’n bietjie laer, maar die veilings verloop goed en die mense koop. Indien jy goeie diere het, sal boere steeds koop.”
Staats sê bek-en-klouseer raak steeds wolboere, al gaan woluitvoer danksy onderhandelde protokolle voort. Wolboere kry ook steeds ’n inkomste uit vleis.
“Dissipline in die bedryf raak al hoe belangriker wat naspeurbaarheid en siektebekamping betref. Ons moet dit self doen, niemand van buite gaan dit vir ons doen nie.”
Die bedryf moes in Desember ’n veiling uitstel weens ’n opeenhoping by die Port Elizabethhawe as gevolg van knelpunte verlede jaar oor die kapasiteitsvermoë.
Staats sê hy is verheug oor die nuus dat verbeteringe tans by die hawe aangebring word.