RAMAPHOSA MAAK GROOT BELOFTES OOR KRAG, WATER EN HENNEP
ESKOM sal oor die volgende paar maande sy bedryfsvermoë herstel, maar terwyl dit gebeur, sal die regering as noodmaatreël elektrisiteit bekom van projekte wat alternatiewe kragbronne binne drie tot twaalf maande van goedkeuring kan verskaf.
Pres. Cyril Ramaphosa het in sy staatsrede in die parlement die ekonomiese verwoesting van beurtkrag erken. Hy het gesê daar moet aanvaar word dat beurtkrag in die nabye toekoms ’n moontlikheid sal bly terwyl Eskom nodige onderhoud doen om die betroubaarheid van elektrisiteitsvoorsiening te verbeter.
BYKOMENDE KRAG
Hy het onderneem dat ’n ministeriële direktief binnekort uitgereik sou word ingevolge die geintegreerde hulpbronplan (IRP) om die land se elektrisiteitsvoorsieningsvermoë te verhoog. Dit sal die ontwikkeling van bykomende kragkapasiteit deur herwinbare energie, gas, hidroelektrisiteit, batterye en steenkool moontlik maak.
Die Nasionale Energiereguleerder (Nersa) sal verseker dat alle aansoeke deur kommersiële en nywerheidsverbruikers wat meer as 1 MW elektrisiteit vir eie gebruik genereer, binne 120 dae verwerk word.
Daar sal ook ooreenkomste aangegaan word om bykomende krag van bestaande sonkrag en windaanlegte te bekom. Maatreëls sal ingestel word sodat munisipaliteite wie se geldsake gesond is, krag van onafhanklike energieopwekkers kan bekom.
Hy het bevestig dat Eskom in drie bedryfsdele verdeel sal word, naamlik opwekking, transmissie en verspreiding. Elkeen sal sy eie direksie en bestuurstrukture hê.
Om nuwe beleggings te lok, sal SuidAfrika sy derde beleggingskonferensie in November hou.
In die eerste twee jaar van hierdie poging is verbintenisse van R664 miljard vir belegging gesmee. Dit is meer as die helfte van die teiken van R1,2 biljoen wat vir vyf jaar gestel is.
DIE LANDBOU EN DIE GRONDKWESSIE
Wat die landbou betref, het Ramaphosa gesê dat die regering gereed is om ’n wysigingswetsontwerp oor onteiening ter tafel te lê nadat die parlementêre proses rondom die voorgestelde wysiging van art. 25 van die Grondwet voltooi is. Dit sal die omstandighede aandui waaronder die onteiening van grond sonder vergoeding toelaatbaar sal wees.
Die regering het reeds 44 000 ha staatsgrond vir restitusie toegestaan en sal vanjaar sowat 700 000 ha staatsgrond vir landbouproduksie beskikbaar maak. Voorkeur sal gegee word aan die jeug, vroue, mense met gestremdhede en diegene wat op kommunale grond boer.
Voorts sal begunstigdes van grondhervorming verpligte opleiding moet ondergaan voordat die regering grond aan hulle sal toestaan.
Rakende waterlisensies het Ramaphosa gesê die tyd is verby dat jare daarvoor gewag moet word. “Ons kan aankondig dat waterlisensies nou binne 90 dae uitgereik sal word.”
PLANNE MET HENNEP
Die regering gaan hom verbind tot die kommersialisering van hennep. Ramaphosa het gesê die regulasies vir die kommersialisering van hennep sal nog vanjaar afgehandel word. Die bedryf sal onder meer vir veral kleinskaalse boere geleenthede bied.
Landbouweekblad het verlede jaar berig dat riglyne vir die kommersialisering van hennep reeds opgestel is, maar dat dit nog deur die regering goedgekeur moet word.
Die Landbounavorsingsraad het langer as 20 jaar navorsing gedoen oor die kweek van dié plant vir die gebruik van sy basvesel vir medisyne en tekstiele. Hy het die kultivars SA Hemp1 en SA Hemp2 ontwikkel. Proewe met die plante het die beste in die Oos en WesKaap gevaar.