‘DÍT IS WAAROM SERNICK SE BENADERING SLAAG’
Me. Jacqui Middleton en haar man, Keith, verbou mielies, koring, lusern en pekanneute op 300 ha besproeiingsgrond naby Jacobsdal. Danksy Sernick en die Jobs Fund se program het Jacqui en haar dogter, Joy, sedert 2018 ’n veekomponent by die boerdery gevoeg. Hulle het ’n kommersiële kudde van 100 beeste en 200 skape.
“Ek en Keith het in 2008 begunstigdes van die regering se grondhervormingsprogram geword. Die plaas wat ons gekry het, was deel van ’n bankrot boedel en daar is vir tien jaar geen onderhoud gedoen nie. Daar was net een werkende spilpunt wat sowat 20 ha lusern besproei het. Dit was ou lusern en nie meer winsgewend nie.
“Die regering was nie daar met ondersteuning of finansiële hulp nie en ek het uit my onderwyssalaris die plaas probeer opbou. Die stres het ’n groot tol op my man se gesondheid geëis. Niks was soos ons gedroom het dit sou wees nie.
“Ons het besluit ek moet landbou gaan studeer terwyl my man op die plaas sou bly om die praktiese boerderyvaardighede van besproeiingsboerdery te leer. Op die ouderdom van 45 het ek weer aan die Universiteit van die Vrystaat gaan studeer en uiteindelik ’n meestersgraad in die landbou behaal.”
Teen 2018 het die Middletons gehoor van die opleidingsprogram wat Sernick en die Jobs Fund vir opkomende boere aanbied.
“Dit was lewensveranderend. Wat die program merkwaardig maak, is dat dit ’n holistiese benadering volg. Dit het ’n stewige akademiese grondslag gelê, ons het praktiese opleiding gekry en ons het elkeen ’n mentor gehad wat ons gereeld op die plaas kom besoek.
“Ons is ook toegerus met infrastruktuur wat dit makliker gemaak het om met beeste te boer. Ons enkele beeskamp is in verskillende kampe onderverdeel en Sernick het vir ons ’n beeshanteringsgerief opgerig.
“Ons het ’n jaar lank somer en winterlekke vir die beeste gekry, selfs vir dié deel van ons kudde wat nie aan Sernick terugverkoop gaan word nie. Ons is opgelei oor die korrekte gebruik van dieremedisyne en het medisyne van Afrivet gekry. Die program het selfs ’n jaar lank die salarisse van drie arbeiders betaal wat ons met die beesboerdery help.
“Nick Serfontein verdien alle eer vir die voortou wat hy as kommersiële boer geneem het om medeboere te help. Daar is kommersiële boere wat net wag dat opkomende boere misluk. Ek wil hulle waarsku: As dit gebeur, sal dit rampspoedig vir SuidAfrika wees. Kom ons hef liewer boere op wat slegter daaraan toe is as ons.”