BETER UITVOER LAAT WYNBOERE SE BEURSIES BULT
DIE Australiese wynbedryf kon die gemiddelde prys van ’n ton druiwe binne vyf jaar met ’n verstommende 43% laat styg.
Australiese wynboere het in 2014-’15 altesaam $463 (R4 567) per ton wyndruiwe verdien. Verlede jaar was die gemiddelde druiweprys $664 (R6 549) per ton. Suid-Afrikaanse druiweboere het in 2017 gemiddeld R3 550 per ton druiwe (op plaasvlak) verdien. Verlede jaar was die gemiddelde prys R5 004 per ton.
“Australiese boere het besef hulle sal die druiweprys net kan verhoog as hulle sukses in hul uitvoermarkte behaal. Daar is ’n baie sterk verband tussen die twee. As ons uitvoer suksesvol is en ons ’n beter waarde kry vir dit wat ons produseer, vloei dit deur na ons druiweprodusente,” het mnr. Andreas Clark, uitvoerende hoof van Wine Australia, op Vinpro se inligtingsdag in Kaapstad gesê.
Die land se wynbedryf het van 2005 tot 2014 ’n moeilike tyd beleef met ’n wankelrige naam, ongunstige wisselkoers en die internasionale ekonomie wat in ’n krisis is.
BESTE GEHALTE
“Ons het besluit om op ons heel beste gehalte klem te lê en daardie storie aan die res van die wêreld te vertel. Ons voer meer as 60% van ons produksie uit. Daarom doen ons alles in ons vermoë om uitvoergeleenthede te ondersteun.”
Dié strategie was só suksesSaam vol dat Australiese uitvoer na China die afgelope vyf jaar met ’n bykans sprokiesagtige 306% gegroei het. Dié mark is nou $1,2 miljard (R11,84 miljard) werd. Die gemiddelde waarde van uitvoerwyn het met 43% tot $3,74 (R36,89) per liter gestyg.
Hy sê hoewel Brittanje steeds hul belangrikste mark bly wat volume betref (en dit ’n waardevolle mark bly), konsentreer hulle nou “onbeskaamd” op China en Amerika om groei te bewerkstellig.
STAATSTEUN
“Ons is baie gelukkig, want daar is groot ondersteuning van die regering se kant af. Dit vloei deur na handelsonderhandelinge.”
Vir elke $1 wat die bedryf aan navorsing en ontwikkeling bestee, gee die regering ook $1. Dit het die Australiese wynbedryf in staat gestel om sowat 180 navorsingsprojekte te begin.
met die tegniese vooruitgang belê hulle ook groot daarin om markinsae te kry en menslike hulpbronne te ontwikkel.
Die Australiërs het verlede jaar net minder as 1,7 miljoen ton druiwe geoes. Dit was te midde van verskeie klimaatsprobleme. Die land het meer as 146 000 ha onder wingerd.
Clark het ook benadruk dat die bedryf al die afgelope paar jaar navorsing oor rookbesoedeling van druiwe doen.