VERAL KLEINER BOERE TREK SWAAR

Die heersende verbod op onder meer veilings van diere met gesplete kloue om die verspreiding van bek-en-klouseer te keer, het die aandag verskuif van die tradisionele aanbied van veilings na skakeldienste en ander veilingsmetodes, soos safari-, video- en internetveilings.

Mnr. Willie Meyer, GWK se hoof van veilings en eiendomme, sê sy afdeling se inkomstestroom ondervind ook die druk vanweë die veilingverbod wat die meeste afslaers tans benadeel.

Die veilingsverbod is ’n week voor GWK se Kerstydveiling op Humansdorp aangekondig. Dit het hom verplig het om inderhaas ander planne te beraam. Dié gebied se Desember-veiling, waarvoor nagenoeg 1 300 beeste en 3 000 skape ingeskryf was, is ’n week voor die tyd verander na ’n safariveiling waarvolgens die kopers die verkopers se plase moes besoek.

GWK kon slegs sowat 800 beeste van die groter produsente op dié manier bemark. Sowat 500 kon nie bemark word nie. “Dit is moeilik om die diere van die kleiner produsente die afgelope drie maande te bemark, aangesien hulle nie op die gebruiklike kommersiële veilings bedien kon word nie,” sê hy. “Een van die ongunstige gevolge was dat sommige produsente wat nie hul vee op die gebruiklike veilings kon bemark nie, onder meer gesukkel het om bonusse aan hul werkers te betaal.”

Volgens Meyer is GWK se veilingsgebied nie deur die eerste verbod van veilings in die vier noordelike provinsies geraak nie. Die afgelope kwartaal word sy eenheid egter geldelik gestrem, aangesien sowat 70% van die veilingsdiens se inkomste uit die aanbied van regstreekse veilings verkry word.