Bierreus dagvaar Agri Mega-hoës vir R26 miljoen
DIE Suid-Afrikaanse Brouerye (SAB) dagvaar mnr. Orton King, ’n direkteur van die Agri Mega-groep, en mnr. Jerome Topley, nóg ’n betrokkene by die groep, vir meer as R26 miljoen vir wat die brouery beweer is roekelose sakebestuur en die bedoeling om SAB te bedrieg.
Die dagvaarding hou verband met ooreenkomste wat SAB in 2013 en 2014 met filiale van die Agri Mega-groep aangegaan het, voor die samesmelting met die Belgiese reus AB InBev.
In hofstukke wat verlede November by die hooggeregshof in Kaapstad ingedien is, eis SAB dat King en Topley R26 287 007 plus rente aan die brouery terugbetaal.
TRANSFORMASIE
Die twee was direkteure van Agri Mega Enterprises (AME), ’n bedryf s maatskappy wat binne die Agri Mega-groep gestig is om onder meer die ontwikkeling van opkomende boere en die volhoubare grondhervorming en transformasie in die landbousektor te ondersteun.
Een van SAB se aanvullende doelwitte was ook om volhoubare en mededingende landbouprojekte te ondersteun en uit te brei. In die lig daarvan het die brouery in 2013 en 2014 ooreengekom om
AME se projekte vir opkomende boere te finansier.
SAB voer in hofstukke aan dat hy van Julie 2014 tot Julie 2015 ’n bedrag van R52 094 440 aan AME geleen het om boere by te staan met die produksie van gars en mielies. Daar is ooreengekom dat die geld terugbetaal sou word ná elke oes. AME het glo minder as die helfte van die projekgeld (R25 407 432) terugbetaal.
SAB voer aan hoewel AME die geld uitsluitlik vir landbouprojekte moes aanwend, het SAB vasgestel dat AME oor ’n tydperk van ’n jaar R38 600 569 na die bankrekening van Agri Mega NPC, 'n onderneming sonder winsoogmerk binne die groep, oorbetaal het.
Agri Mega NPC sou ook ondersteuningsdienste aan die landbou bied, maar het volgens die hofstukke ten tye van die dagvaarding geen bates, bankrekening of werknemers gehad nie en was dormant. King en Topley het hulself voorgehou as die uitvoerende direkteure van Agri Mega NPC. Topley het op 28 Februarie 2018 as direkteur bedank.
Nadat King die hooggeregshof in Kaapstad genader het vir voorlopige likwidasie, is AME in Junie 2016 gelikwideer.
BETALINGS GEMAGTIG
SAB voer aan dat King elk van die betalings sonder SAB se medewete gemagtig het. Gevolglik kon AME nooit die uitstaande balans van meer as R26 000 000 terugbetaal nie. SAB voer aan King het hom laat glo dat AME die lenings sou kon terugbetaal. SAB voer aan King het “willens en wetens tot nadeel van AME se finansiële vooruitgang opgetree, op ’n growwe nalatige” manier. Hy het glo sy posisie as groepbestuurshoof van Agri Mega “misbruik om dit reg te kry”, aldus SAB se klag.
Die SAB voer voorts aan dat die onregmatige betalings aan die onderneming sonder winsoogmerk nie aangeteken is in die rekords en finansiële state van AME vir die boekjare 2015 en 2016 nie. Dit het glo gelei tot die wanvoorstelling van AME en Agri Mega NPC se finansiële posisie.
Afgesien van die meer as R26 miljoen eis SAB ook rente op die uitstaande bedrag en dat King en Topley die koste van die geding moet betaal.
King en Topley het aangedui hulle verdedig die geding en sou kort ná druktyd hul repliek by die hof inhandig. Landbouweekblad berig volgende week daaroor.