BLAARVOEDING KAN ROOIBOS SKOP GEE
Blaarvoeding was nog nooit ’n algemene praktyk by rooibostee nie, maar ’n boer meen dit kan ’n opbrengsverhoging van tot 30% meebring.
Mnr. Gerrit de Beer van G&G Boerdery naby Clanwilliam is besig om die voordele van die toediening van blaarvoeding by rooibostee te ondersoek.
Produksienavorsingsinligting vir rooibostee is nie geredelik beskikbaar nie. Daarom moet boere, soos De Beer, hul eie proewe doen om nuwe praktyke te ontwikkel.
Die rooibosplant kom natuurlik voor in die Clanwilliam-omgewing en vaar goed in natuurlike toestande. Dit word ook aangeplant.
“Die produksie van rooibostee gaan vir my oor opbrengs. As jy jou landerye met PA (pirrolisidien-alkaloïede) skoon hou van onkruide, dan is die opbrengs die faktor wat die inkomste uit die tee bepaal.”
Volgens De Beer het hy teen die einde van die vorige winter Intrasol-blaarvoeding wat vir sitrusbome gebruik word, in sy skuur oorgehad. Dit is ’n 6:1:3 (44) NPK-produk met nege mikro-elemente daarby, onder meer swael, magnesium, sink, yster en mangaan.
“Ek weet rooibostee is gevoelig vir stikstof omdat dit ’n peulplant is. Ek wou nie die tee brand nie en was daarom skrikkerig om aanvanklik ’n té hoë dosis op te spuit.”
Begin September, tesame met die eerste lente-uitloopsels, is 1 kg Intrasol in 200 liter water per hektaar met ’n Cima-blaasspuit op die plante gespuit.
Twee landerye is bespuit, elk met ’n kontrole langsaan. Teen middel November, ongeveer 70 dae ná toediening, was die aanvanklike aanduiding dat die blaarvoeding ’n beduidend gunstige uitwerking op die blaar- en lootlengte gehad het.
“Ons sal eers ’n werklike bepaling kan maak as die tee lekker ryp is teen Maart. Ek reken ons kan minstens 20% tot 30% hoër produksie kry van die landerye waar ons die blaarvoeding toegedien het,” sê De Beer, wat onlangs die produksiekant van hul boerdery by sy pa, Gert, oorgeneem het.
Mnr. Jaco Visser, streekverteenwoordiger van Viking, het De Beer in November aangeraai om in ’n opvolgproef verskillende dosisse tot 2 kg/ha van die blaarvoeding te beproef.
“As hierdie proewe herhaal kan word en De Beer se aanvanklike bevindinge bevestig word, kan dit vir boere ’n bekostigbare manier wees om tee se produksie en gehalte ’n hupstoot te gee.”
Teen ’n dosis van 2 kg/ha beloop die produken toedieningskoste van die betrokke blaarvoeding minder as R100/ha.
“Teen ’n teeprys van R20/kg moet jy dus slegs 5 kg/ha meer oes om die toediening te regverdig. Teen ’n gemiddelde opbrengs van 750 kg/ha verteenwoordig 5 kg minder as ’n 1% verhoging in opbrengs,” sê Visser.