INTERNASIONALE LANDBOUNUUS
1 CHINA | Koronavirus kan vrugtemarkte knou
Tafeldruif-uitvoerders in Suid-Afrika, Chili, Uruguay en Australië vrees dat die koronavirus-uitbreking in China hulle nadelig kan raak. Dié uitvoerders is nou op die hoogtepunt van hul uitvoertydperk.
Die inname-tempo in Sjanghai het volgens skeepsmaatskappye afgeneem weens die verlengde Chinese nuwejaarvakansie van twee weke wat as gevolg van die virus ingestel is. Teen middel Februarie was daar aanduidings dat sake in die hawens weer na normaal begin terugkeer.
Een uitvoerder het aan Fruitnet gesê Suid-Afrika se oes is vanjaar kleiner. Besendings na China is verminder terwyl daar gewag is dat die situasie na normaal terugkeer. – Fruitnet
2 AMERIKA | Corteva roep chlorpirifos vaarwel toe
Corteva Agroscience, die grootste vervaardiger van die plaagdoder chlorpirifos, het aangekondig hy gaan die vervaardiging van dié omstrede plaagdoder vanjaar uitfaseer. Die maatskappy sê dit is weens ’n drastiese afname in die aantal boere wat die middel die afgelope twee dekades gebruik.
Chlorpirifos is in 1965 deur die Dow Chemical Company as ’n plaasvervanger bekend gestel vir DDT, wat met gesondheids- en omgewingsrisiko’s verbind is.
Dié besluit deur Corteva kan die begin van die einde vir ander chlorpirifosprodukte aandui.
In 2012 het die Columbia-universiteit in ’n studie ’n verband gevind tussen blootstelling aan chlorpirifos en kognitiewe gebreke by kinders. Die omgewingsbeskermingsagentskap het daarop die binnenshuise gebruik van die middel in Amerika verbied. – The Counter
3 AUSTRALIË | Rekordvloede blus rekordbrande
’n Week van swaar reën het teen 13 Februarie alle brande in NieuSuid-Wallis geblus of onder beheer gebring. Die brande het in ses weke meer as 2 400 huise en 5,4 miljoen hektaar in dié Australiese deelstaat verwoes.
Die reën het egter ook vloedskade en modderstortings veroorsaak. Landbouleiers het die 90% Australiërs wat binne 100 km van die kus af woon, gewaarsku dat die droogte nog glad nie verby is nie. Die damme in die opvanggebied van die Murray Darling-kom (MDB) het teen 5 Februarie net 26% van hul kapasiteit gehad, volgens die MDB Authority. In die noordelike komgebied was dit slegs 7%.
Dele van die noordelike MDB-opvanggebied het binne ses weke die ekwivalent van hul jaarlikse reën gekry. Die Macquarievallei is egter steeds kurkdroog. Elders was die damme ook leeg.
– Stock and Land; NPR