‘Verskuilde motiewe’ sit agter SAB-eis teen Agri Mega-base
HY staan die SAB se aanspraak op meer as R26 miljoen en beweringe van roekelose sakebestuur ten sterkste teen, en twyfel of die maatskappy se regsgeding ooit by ’n verhoor sal uitkom.
Só sê mnr. Orton King, ’n direkteur van die Agri Megagroep, wat saam met mnr. Jerome Topley, nog ’n voormalige direkteur binne die groep, vir meer as R26 miljoen gedagvaar word deur die Suid-Afrikaanse Brouerye (SAB).
SAB se dagvaarding spruit uit ooreenkomste wat SAB in 2013 en 2014 met filiale van die Agri Megagroep aangegaan het voor die samesmelting met die Belgiese reus AB InBev. In hofstukke wat verlede November by die hooggeregshof in Kaapstad ingedien is, eis SAB dat King en Topley R26 287 007 plus rente aan die brouery terugbetaal.
Orton en Topley was direkteure van Agri Mega Enterprises (AME), ’n bedryfsmaatskappy wat binne die Agri Megagroep gestig is om onder meer die ontwikkeling van opkomende boere en die volhoubare grondhervorming en transformasie in die landbousektor te ondersteun. Een van SAB se verdere doelwitte was die ondersteuning en uitbreiding van volhoubare grondhervorming en mededingende landbouprojekte. In die lig daarvan het SAB in 2013 en 2014 ooreengekom om
AME-projekte vir opkomende boere te finansier.
King beklemtoon dat hy en Topley nie-uitvoerende direkteure van AME was. Die besturende direkteur was mnr. Noël Bastiaan.
LENING
SAB voer in hofstukke aan dat hy van Julie 2014 tot Julie 2015 ’n bedrag van R52 094 440 aan AME geleen het om boere by te staan met die produksie van gars en mielies. Daar is ooreengekom dat die geld ná elke oes terugbetaal sou word. AME het luidens hofstukke minder as die helfte van die projekgeld (R25 407 432) terugbetaal.
In pleitstukke wat King op 17 Februarie ingedien het, sê hy hy is bewus van ’n ooreenkoms tussen AME en die SAB, maar hy kan nie die brouery se bewerings oor bogenoemde bedrae erken of ontken nie. Hy sê SAB moet dit bewys. King sê na sy wete het SAB nie geld aan AME geleen nie. AME het geleende geld aan opkomende boere geadministreer.
SPEKULATIEF
King ontken ook SAB se bewerings dat AME oor ’n tydperk van ’n jaar R38 600 569 na die bankrekening van Agri Mega NPC, ’n onderneming sonder winsoogmerk binne die groep, oorbetaal het.
In ’n verklaring sê King se regspan hierdie aansprake word ten sterkste teengestaan. Mnr. Mauritz Bester, van Besters Prokureurs, sê hulle glo die eise het geen meriete in enige geregshof nie.
“Dit is bloot ingestel met spekulatiewe motiewe en ernstig verskuilde motiewe van individue. Ons kliënt behou al sy regte voor om vorentoe die gepaste regsaksies in te stel teen ieder en elk wat, op welke wyse ookal, ’n inuendo geskep het dat ons kliënt, op welke wyse ookal, onbehoorlik sou opgetree het in welke kapasiteit ookal in enige opsig ten opsigte van die skuldoorsaak van die geding.”
Topley kon nie vir kommentaar bereik word nie.
–