Dié studente blink uit in landbou
Die gesogte Landbouweekbladmedalje (bo) is verlede jaar weer aan die beste leerders in landbouvakke by landbou-opleidingsinstellings en skole oorhandig. Met dié medalje wil Landbouweekblad talentvolle leerders se toewyding erken en die landbou as loopbaan vir hulle aantreklik maak. ADÉLE ENGELBRECHT het die inligting saamgevat. ELSENBURG
Anzil Ontong is die dux-leerder in die leerlingskap vir verdere onderwys en opleiding in die landbou. Hy is van Saron, ’n landelike gemeenskap tussen Wellington en Porterville. Ontong het by Elsenburg ingeskryf omdat hy ’n liefde vir en spesiale belang in wingerdbou het en om eendag ’n suksesvolle, erkende wynmaker te word. Hy het vir Landbouweekblad gesê “die liefde wat ek vir die landbou ontwikkel het, gaan nie daar eindig nie – ek wil eendag die minister van landbou word”.
Dawn Diana Loos is die dux-student in die graad BAgric. Sy is ’n boorling van ’n appel-en-peerplaas naby Elgin, en woon steeds daar. Loos is passievol oor twee dinge in die landbou, naamlik plantproduksie en perde. Van jongs af het sy vrugte, groente en bessies gepluk, opgesny en ontleed. Sy stel belang in die produksie van kernvrugte en onderdak-groenteverbouing. Sy stel belang in navorsing om onderdak-groenteverbouing te optimaliseer om toekomstige hindernisse uit die weg te ruim. “Solank ek ’n loopbaan in die landbou kan vestig, sal ek op my gelukkigste wees.” Vanjaar is sy nagraads ingeskryf aan die Universiteit Stellenbosch in landboukunde. Sy wil binne die volgende vyf jaar haar doktorsgraad behaal. Rozé Gibeton Mcyondo Tailor is die dux-student in die hoër sertifikaat: landbou. Hy is ook van Saron en is baie betrokke in die gemeenskap. Tailor hou daarvan om mense te help en tot hul bemagtiging by te dra. “Ek het die landbourigting gekies omdat dit een van my sterk punte is. My langtermynplan is om verder te gaan studeer en ’n honneursgraad in die landbou te behaal. Ek wil graag eendag ’n plaasbestuurder wees of selfs ’n gekwalifiseerde vrugte-inspekteur. Op kort termyn wil ek my eie boerdery begin.”
GROOTFONTEIN
Carla (Muggie) du Plessis van Kameeldrif-Wes is staande toegejuig toe sy as die opleidingsinstituut se dux-student en ontvanger van Landbouweekblad se medalje aangewys is. Sy bly op ’n plaas naby Hartbeespoort saam met haar ouers, Japie en Francisca, jonger suster, Erica, en grootouers, Japie sr. en Erika. Ná matriek het sy haar vlieënierslisensie bekom en hoewel sy dit geniet om te vlieg, het sy besef sy geniet dit meer om te boer. Sy het by Grootfontein ingeskryf om meer oor boerderypraktyk te leer, maar spesifiek kleinveeproduksie en -bestuur. Sy het gemiddeld 90% oor drie jaar gehandhaaf en 21 eerbewyse op die prysoorhandiging ontvang. “Niks maak my gelukkiger as om ’n sterk lam te sien suip aan sy ma, die reuk van reën wat naderkom of hoe sag my hande voel nadat ek wol hanteer het nie.” Vanjaar boer sy saam met haar pa en dit is haar verantwoordelikheid om die ooikudde te bestuur en die voerkraallammers te bemark.