SÓ SÊ ’N PATATBOER
Groente is ’n belangrike vertakking in Dawie Rothmann van M.A Rothmann en Seuns by Brits se boerdery. Patats is een van sowat nege groentesoorte wat hulle verbou. Hy plant ongeveer 20 ha patats in seisoen, en oes 30 ton per dag daarvan.
Hoekom plant jy patats?
Die supermarkte het my gevra daarvoor! Patats maak ook deel uit van ons wisselboustelsel. ’n Lekker voordeel van patats is dat die kos onder die grond groei. Die hael kan dus net die ranke wegslaan, maar nie die kos nie. Ons klimaat is ook geskik vir patats, want dit hou van die lekker baie reën en hitte wat ons omgewing kry.
Is dit ’n vrugbare gewas?
Ja, die opbrengste is goed, sonder dat jy baie kunsmis hoef te gee. Ons bemes glad nie baie nie, basies net kalium, kalsium en fosfate, omtrent niks stikstof nie.
Wanneer breek julle patatseisoen aan?
Ons plant gewoonlik einde Augustus en begin dan einde Januarie met bemarking.
Vertel meer oor die patatkultivars wat beskikbaar is?
Daar is ’n groot verskeidenheid kultivars in ’n klomp kleure beskikbaar. Ek plant egter die gewone rooi patat, genaamd Blesbok.
Watter struikelblokke is daar vir patatboere?
Die patatkewer is ons grootste probleem. As dit droog raak en jou grond maak krake, klim die kewer in en veroorsaak swart kolletjies op die patat. Ons spuit ’n chemiese middel voorkomend om dit dood te maak.
Waar bemark jy patats?
Ek verkoop patats aan Pick n Pay en Checkers, asook op die varsproduktemarkte in Johannesburg en Pretoria.
Waarom is dit lekker om met groente te boer?
Ons het grootgeword daarmee, en dit is lekker om kos te produseer en Suid-Afrika te help met voedselsekerheid. Sommige jare maak jy nie geld nie, maar die jare wat ’n mens wel geld maak, maak jy darem genoeg.
Het jy wenke om patats voor te sit?
As ons vleis braai, draai ons dit graag in foelie toe en gooi dit in die as om gaar te word. Dis net so lekker as jy dit kook saam met vanielje. Voor jy opskep, kan jy ook ’n bietjie vla inroer en dit warm of koud eet. Ons het ook al skyfies gemaak wat ons in olie braai.