DIE ANDER SÊ

DIE wêreldwye sluiting van restaurante, sportstadions en rolprentteaters beteken dat daar vir die eerste keer in 40 jaar ’n daling in die vraag na suiker is, ná regerings, dokters en TVsjefs mense vir jare sonder sukses probeer oorreed het om minder suiker in te neem.

“Die verbruik van kos en drankies buite die huis is normaalweg meer as wat jy dit nou mee sal vervang en tuis verbruik,” sê mnr. Ben Seed, ’n ontleder by die voorsieningskettingdiensverskaffer Czarnikow in Londen.

Die suikerbedryf was reeds voor Covid19 onder beleg. Die groei in vraag, wat grootliks deur ontwikkelende lande gedryf is, het die afgelope jare verlangsaam weens suikerbelastings in talle lande en druk van gesondheidsgroepe om koolhidraatinname te verminder weens vetsug. Maatskappye het gereageer met minder vetmakende lekkernye en suikervrye koeldranke.

Niks hiervan het egter soveel impak gemaak soos die uitwerking van inperkings op uitgawes buite die huis nie. En die wêreldwye resessie takel ook vraagvooruitsigte af.

Czarnikow raam dat suikerverbruik in die huidige seisoen met 1,2% sal daal tot 169,9 miljoen ton, en die Internasionale Suikervereniging sê die krisis het die meeste van 2020 se geprojekteerde verbruikstoename uitgewis, en groter verliese kan volg.

Net in die eerste drie weke van April het CocaCola se volumes met sowat 25% gedaal, en PepsiCo verwag ’n daling in inkomste in die tweede kwartaal. Die dalende vraag sal groter as verwagte suikersurplusse tot gevolg hê in dié en die volgende seisoen.