Vlak 3 stuit pynappel-pryslopie
DIE skielike daling in die prys van pynappels, wat in die eerste week van Mei die hoogte ingeskiet het, het waarskynlik te make met die toelating van drankverkope sedert 1 Junie, berig Fresh Plaza. Talle verbruikers het pynappels aangekoop om tuisgemaakte bier te maak tydens die drankverbod.
Pynappels het vroeg in Mei teen R18,54/kg op munisipale markte verhandel, maar die prys het sedertdien teruggesak tot R9,20/kg.
Die prys van piesangs het teruggesak tot R7,21/kg vroeg in Junie.
Volgens Fresh Plaza het lemoene, waarvan daar tans ’n baie groot aanbod op die mark is, teen gemiddeld R3,35/kg verhandel, wat as ’n mededingende prys beskou word.
Die prys van appels en pere was bestendig teen R6/kg tot R7/kg.
Avokado’s bly ’n gunsteling by Suid-Afrikaanse verbruikers en het in die tweede week van Junie selfs beter pryse behaal as in die vorige week. Dié supervrug het teen druktyd gemiddeld R10,76/kg op varsproduktemarkte behaal.
—