Kaapstadse kelder versprei kospakkies vir hongeres
DIE wynkelder Durbanville Hills het sy proelokaal omskep in ’n verspreidingspunt vir kospakkies vir mense wat swaarkry vanweë die Covid-19-inperking en ekonomiese afswaai. Daarvoor werk hy saam met SA Harvest en Mould
Empower Service (MES). Honderde kospakkies word weekliks by die kelder afgelewer en herverpak om aan behoeftige mense in Durbanville, Dunoon, Mamre, Bothasig en Tableview oorhandig te word.
Die kelder se personeel sorteer die kos en wys kosmandjies toe aan plaaslike organisasies, soos The Night Haven Shelter, Savings Sparrows, Won Life en Helping Others. Sodoende word gemeenskappe binne ’n 10 km-radius van die kelder maklik bereik en logistieke probleme verminder.
“Die inperking het ’n groot impak op basies elke bedryf in die land. Organisasies sonder winsbe
jag sukkel om kos te verskaf aan die duisende mense sonder kos of inkomste,” sê mnr. Dirk Steyn, hoofbestuurder van Durbanville Hills se restaurant.
NET DIE BEGIN
Volgens hom is dié inisiatief maar net die begin. Hulle wil graag ander organisasies ook betrek om te help sodat hulle gemeenskappe in nood beter kan bystaan. “Daar
is nie net ’n behoefte aan kos nie, maar ook aan komberse en klere.”
SA Harvest voed daagliks sowat 6 000 mense met meer as 100 000 maaltye wat weekliks deur verskillende organisasies voorberei word. Die organisasie beywer hom ook daarvoor om kosvermorsing te keer en herlei surpluskos vanaf onder meer boere en restaurante na waar dit nodig is.