KOOL SE KLEINNIGGIE IN NAMIBIË ONTDEK

’n Verlangse familielid van kool, broccoli en Brusselse spruite groei in sekere panne in die warm en dorre suide van Namibië. Plantkundiges het eers ’n dekade gelede die eerste keer daarvan bewus geraak en was lank nie seker hoe om dié plante te klassifiseer nie.

Tiganophyton karasense is nou ná uitgebreide navorsing as ’n nuwe spesie, geslag en blomplantfamilie in die wetenskaplike vaktydskrif Phytotaxa beskryf. Dié meerjarige bossie is die enigste lid van die familie Tiganophytaceae.

Hierdie ontdekking trek aandag omdat dit hoogs uitsonderlik is dat ’n nuwe soort plant vandag nog ontdek word wat nie maklik in ’n bestaande familie geklassifiseer kan word nie.

Mnr. Wessel Swanepoel, ’n afgetrede siviele ingenieur en onafhanklike natuurkenner van Windhoek wat bande met die Universiteit van Pretoria (UP) het, het dit in Januarie 2010 die eerste keer in die Karasstreek raakgesien. Die spesie groei net om en in seisoenale panne.

“Sedert ek die plant die eerste keer gesien het, noem ek dit die ‘panplant’,” sê Swanepoel, wat deesdae spesialisnatuurtoere aanbied. “Tiganophyton is Grieks vir panplant.”

Hy sê die panplant is verwant aan kool en broccoli in die sin dat hulle almal aan die groter plantorde Brassicales behoort.

Dié onverwagte verwantskap is vasgestel ná uitgebreide ondersoeke van die plant se DNS deur navorsers van die UP en die koninklike botaniese tuin Kew in Brittanje.

– ENGELA DUVENAGE