BONSMARA BEHAAL R620 000
Uitstekende pryse is op die Bonsmara-stoetery Poggenpoel Molopo se 15de produksieveiling by die Stella-veilingslokaal behaal.
Volgens die afslaersonderneming weerspieël dié pryse die puik diere wat aangebied is.
Mnr. Kobus Poggenpoel en sy seuns se duurste bul, BBM17-203, is teen ’n allemintige R620 000 aan mnr. Schalk van der Merwe (Leeuwheuvel-boerdery) van Christiana verkoop.
Altesame 68 bulle is teen gemiddeld R99 808 verkoop.
Kommersiële vroulike diere het ook goeie pryse behaal en die gemiddelde pryse was soos volg: Koeie met kalwers, R24 338; en koeie (3-in-1), R27 628.
Die veiling is deur Noordkaap Lewendehawe Vryburg saam met Swiftvee aangebied. Mnr. Johan van der Nest was die afslaer.
Die tam ekonomie beïnvloed die pryse van Boerbokke op stoet- en slagveeveilings. Boonop het die Covid-19-pandemie die verbruikersvraag na bokvleis verder laat verswak omdat mense inkomste verloor het en kulturele slagprosesse, soos op troues en begrafnisse, nie kon plaasvind nie.
Veilings duur egter voort en daar is genoeg belangstelling, sê mnr. Craig le Roux, afslaer van Vleissentraal. In vlak 3 van die inperking het belangstelling gegroei en pryse verbeter.
Die weeklikse veilings van slagvee word steeds aangebied, met beperkte getalle mense.
Veilings van stoetdiere word deur ’n samestelling van fisieke en aanlyn veilings aangebied.
Le Roux sê vanweë die dubbele terugslag van bek-en-klouseer en Covid-19 het Vleissentraal vanjaar nog net net een groot fisieke stoetveiling gehou. Dit was in Februarie op Marble Hall met die nodige goedkeuring van die staat.
Le Roux sê skaflike pryse is behaal, maar kopers en verkopers was wel onseker oor die rigting van die mark. Daar was minder kopers vanweë vrese om nuwe diere na plase te bring weens beken-klouseer.
Goeie aanteeldiere, ramme én ooie, het tot R7 000 behaal, wat ’n bietjie minder is as in die verlede. Op vorige veilings was die gemiddelde pryse al tot R8 500 per dier. In Februarie was dit R5 000 tot R6 000.
“Daar was sowat 100 diere en hulle was in ’n goeie kondisie.”