In memorium

’N GROOT figuur in die Namibiese geskiedenis, dr. Dirk Mudge (92), is in ’n hospitaal in Windhoek weens Covid-19-verwante komplikasies oorlede.

Sy oudste seun, Henk, sê sy pa is sowat tien dae lank in die hospitaal behandel vir Covid-19. Nadat dit relatief goed met hom gegaan het, is hy op 26 Augustus oorlede, klaarblyklik weens ’n longinfeksie.

Sedert hy in 1993 uit die politiek getree het, het Mudge op sy plaas by Kalfeld gewoon.

Vyf jaar gelede het hy en sy vrou, Stienie, na ’n aftreeoord in Windhoek verhuis, waar sy drie jaar gelede oorlede is.

Mudge sal veral vir sy rol in die

Namibiese politiek onthou word. Volgens Wikipedia is Mudge op 16 Januarie 1928 op Otjiwarongo gebore. Gedurende sy kleurryke lewe het hy verskeie hoë posisies in die Namibiese politiek beklee.

Hy was ook vanaf 1952 tot 2015 ’n beesboer.

Mudge het aan die Universiteit Stellenboch gestudeer waar hy in 1947 die graad BCom verwerf het. Hy het daarna as boekhouer in Windhoek gewerk. Sy alma mater het in 2016 ’n eredoktorsgraad aan Mudge oorhandig uit erkenning vir sy leiersrol in die Namibiese politiek en om sy landsburgers oor politieke en kulturele grense heen te verenig.

Mudge het in 1961 ’n lid van die wetgewende vergadering van die destydse Suidwes-Afrika (nou Namibië) geword, en was van 1965 tot 1977 lid van die uitvoerende komitee. Hy het hom beywer vir ’n selfregerende Suidwes-Afrika en was van 1975 tot 1977 voorsitter van die Turnhalle-beraad, wat gedien het as grondslag om steun onder die inheemse bevolking te werf. In 1980 is hy as voorsitter van die raad van ministers aangewys.

Hy was ook die stigter van die Republikeinse Party van Namibië en medestigter van die Demokratiese Turnhalle-Alliansie, wat later tot die Populêre Demokratiese Beweging herdoop is.

Nadat Namibië in 1990 onafhanklikheid verkry het, was Mudge lid van die komitee wat die nuwe grondwet vir Namibië geskryf het.

Hy het daarna as parlementslid gedien totdat hy in 1993 uitgetree en op sy plaas, Ovikere, by Kalkfeld gaan woon het.

Mudge was ook die stigter van die Namibiese Afrikaanse dagblad Die Republikein en van die uitgewer Namibia Media Holdings. Hy het tot 2008 in die direksie gedien.

Hy laat vyf kinders, Henk, Chrisna, Rieth, Annalien en Jaco, 16 kleinkinders en 23 agterkleinkinders agter.