SWAMME KAN GEBRUIK VAN INSEKDODERS VERMINDER
Navorsing deur die Universiteit van Kopenhagen in Denemarke toon dat sekere swamme plante help om hulself beter teen insekte te verdedig. Dié bevinding kan weldra die landboubedryf help om minder afhanklik van insekdoders te raak.
Die Deense navorsers het koring- en boontjiesaad met drie soorte swamme geïnokuleer voor dit geplant is. Sodoende kon hulle bewys dat twee van die swamspesies as ’t ware die gewasse se “immuunstelsel” ’n hupstoot teen plantluise gee, luidens ’n artikel in die vaktydskrif New Phytologist.
Luidens ’n verklaring deur die instelling is drie swamspesies, Beauveria bassiana, Metarhizium robertsii en Metarhizium brunneum, in die studie gebruik. Dié swamme is bekend daarvoor dat hulle insekte kan besmet en doodmaak deur direkte kontak.
Die swamme kan hulself ook binne die plante as endofiete vestig, en sodoende ’n uitwerking hê op plante se groei en verdediging teen plae.
Soos die sade ontkiem en opgekom het, het die swamme die plante binnegedring en ’n uitwerking op die plante se eie verdedigingsmeganismes gehad. Dit het tot minder besmetting deur hawerluise (Rhopalosiphum padi) by die koring en swartboonplantluise (Aphis fabae) by die bone gelei, en dus minder skade aan die gewasse.
Tot dusver het navorsers nog kopgekrap oor hoe swamme gebruik kan word om verliese weens insekte te verminder.
“Om dit moontlik te maak om swamme werklik sinvol te gebruik om landbouplae in die toekoms te bekamp, moet ons die meganisme en prosesse agter hul werking verstaan,” sê prof. Nicolai Vitt Meyling, ’n medeprofessor aan die Universiteit van Kopenhagen se departement plant- en omgewingswetenskappe.
Twee van die swamme, Beauveria bassiana en Metarhizium robertsi, het die plantluisbesmetting verminder deur hulself in die plantwortels en -weefsel te vestig. Danksy ’n kweekhuiseksperiment en gevorderde chemiese ontleding kon die wetenskaplikes waarneem dat die swamme die plant help om meer van sy natuurlike verdedigingsmeganisme te produseer gedurende ’n besmetting. Sodoende word die plant se natuurlike immuunstelsel versterk, wat weer tot minder plantluise, wat die plant verswak, gelei het, volgens Meyling.
“Wanneer die plantluise plantsap suig, verloor plante normaalweg energie en hul wortelstelsel en -groei neem af. Plante wat met swamme behandel is en daarna deur plantluise aangeval is, het egter aangepas en hul wortelgroei verhoog sodat hul groeipotensiaal nie afneem nie. Onbehandelde plante het nie sulke aanpassings gemaak nie.”
Die navorsers sê die resultaat is die gevolg van die spesifieke soorte swamme wat getoets is, en nie die soort plante waarop die proewe gedoen is nie.
Hulle meen dat die gebruik van die swamme, tesame met ander omgewingsvriendelike kweekmetodes, sal help om die hoeveelheid insekdoders te verminder wat in die landbou gebruik word. Dit is omdat die swamme ook ’n soortgelyke effek op insekte op die proefplante se wortelstelsels gehad het.