Reël maklik vervoer met aanlyn platform
Dit gee ’n groot gesukkel af as boere en ondernemings op ’n sekere tyd vragmotors benodig en die regte voertuie nie beskikbaar is nie. Linebooker se aanlyn diens is begin om frustrasies in die logistieke bedryf namens kliënte en vervoerverskaffers in die kiem te smoor.
Linebooker is ’n aanlyn platform waarop kliënte wat goedere wil verskuif, binne minute in kontak is met vervoerders wat leë vragmotors beskikbaar het. Met ’n beskikbare vloot van meer as 13 000 vragmotors – hoofsaaklik platbakke, verkoeling-, Pantechen Tautliner-soort vragmotors – kan Linebooker se kliënte hul vragte met gemak verskuif.
Danksy dié platform bespaar maatskappye minstens 30% van die tyd wat gewoonlik aan vervoerreëlings afgestaan word. Met net ’n paar klikke verbind Linebooker vraag en aanbod, en organiseer en neem verantwoordelikheid vir die hele proses – van prysbedinging en betaling tot versekering. Alle vragvervoer, asook die bevestiging van die op- en aflaaiproses, is intyds aanlyn sigbaar vir almal met toegang tot die stelsel.
Die vervoerbedryf was reg vir ’n eenvoudige oplossing, soos wat Uber vir die taxibedryf en Airbnb vir die hotelbedryf was. Gevolglik het Linebooker ’n sentrale koördineringsplatform geskep. Kliënte kan binne enkele minute by Linebooker aansluit en transaksies doen wat tot reusebesparings kan lei. Die maklike werking van en besparings op die platform is sekerlik die grootste dryfveer agter Linebooker se huidige groei. Meer as 270 kliënte – megaboere, landbouondernemings, boerderye, myne, groot maatskappye en klein én groot private ondernemings – het al by die platform aangesluit.
SLIM TEGNOLOGIE
Linebooker gee jou maklike toegang tot meer as 320 geregistreerde topvervoerondernemings in Suid- en Suider-Afrika. Met ’n bykomende belegging deur dr. Patrice Motsepe se African Rainbow Capital en vennote in September 2020 word die gebruiksgemak van die platform nou verder verbeter en die netwerk nog meer uitgebrei.
Linebooker-tegnologie is gebou om kommunikasie en bedryfskoördinasie tussen kliënte en vervoerders te vereenvoudig deur dit so doeltreffend moontlik te maak. Met behulp van die gebruikersvriendelike platform kan kliënte maklik vragte en vragmotors met hul huidige diensverskaffers koördineer. Hulle kan binne 30 minute toegang tot 320 vervoerders en meer as 13 000 vragmotors kry om die beste markprys of groter vermoë te verseker.
Asof die gerief en toeganklikheid nie die platform reeds aantreklik genoeg maak vir kliënte nie, bied dit boonop aan klein ondernemings dieselfde bedingingsmag as groot maatskappye.
KEUSE VAN MODELLE
Linebooker se platform bestaan uit twee modelle, naamlik ’n toedeling aan jou eie diensverskaffers en Linebooker se opemarkbieplatform.
Deur middel van die toedelingsmodel gebruik kliënte die platform om vragte en vragmotors met hul huidige diensverskaffers te koördineer teen vaste, ooreengekome tariewe.
Met die opemark-bieplatformmodel kry kliënte dadelik toegang tot die meeste ander Suider-Afrikaanse diensverskaffers wat ’n bod kan plaas op kliënte se vragte. Hierdie opsie bied ekstra vermoë en/of beter tariewe van meer as 320 van die beste vervoerondernemings. Linebooker neem verantwoordelikheid vir die betalings, versekering en diens met ’n bedryfspan wat dag en nag beskikbaar is.
DEURSIGTIGHEID
Een van die grootste logistieke probleme waarmee ondernemings wêreldwyd sit, is die seisoenale beskikbaarheid van vragmotors. Dit kan maklik spanning veroorsaak vir ondernemings én vervoermaatskappye.
Die meeste kliënte betaal in minder besige tye ’n premie aan hul huidige diensverskaffers met die veronderstelling dat hulle in besige tye hul vragte sal kan vervoer. Dit is dus te verstane dat kliënte baie ontsteld is indien vragmotors dan nie in die spitstyd beskikbaar is nie.
Totale deursigtigheid is een van Linebooker se kernwaardes. Uit ervaring weet mense in die bedryf daar bestaan nie iets soos 100% gewaarborgde aanbod tydens spitstye nie. Dit word gerugsteun deur die toename in kliënte wat Linebooker in 2020 in spitstyd gebruik het toe hulle nie voertuie van hul huidige verskaffers kon kry nie. Danksy Linebooker se twee modelle is dit moontlik om vooruit vir jou seisoenale vraag te beplan en terselfdertyd besparings in die lae seisoen te handhaaf.
REGISTREER MAKLIK
Kliënte kan onmiddellik toegang tot Linebooker se bieplatform kry deur te registreer op die webwerf
Vul jou besonderhede in en toets dan die stelsel. Daar is geen verpligting om ’n vrag te aanvaar sodra die bod gesluit is nie. Kliënte sal vinnig agterkom hoe die proses werk en watter waarde die stelsel bied. Indien ’n vrag aanvaar word, behartig Linebooker alle reëlings, risiko’s en betalings namens die kliënt.
“Verandering is nooit maklik nie, maar gegewe die voortdurende logistieke frustrasies in alle ondernemings kan die voordele van slimtegnologie nie meer geïgnoreer word nie. Dit kan ’n groot verskil maak in jou besigheid,” sê mnr. Naudé Rademan, uitvoerende hoof van Linebooker.