Heinings maklik herstel met draadspantoestel
’n Nutstoestel vir die herstel van draadheinings is die jongste toevoeging tot hierdie bekende Vrystaatse planmaker se reeks oplossings vir boere.
Bultfontein se patentkoning, mnr. Michris Janse van Rensburg van die plaas Mooiuitsig, steek nie lyf weg as dit by hande-arbeid kom nie. Sy boereplanne pas kleinskaalse boere soos ’n handskoen, maar dit stuit nie groter boere om uit sy praktiese ervaring voordeel te trek nie.
HEININGS HERSTEL
Die algemeenste stuk gereedskap wat boere in hul bakkies aanhou, is sweerlik ’n draadtang. Wanneer heinings egter herstel moet word, moet hulle dieper in hul gereedskapskis krap vir ’n draadspanner om die individuele heiningdrade snaarstyf te span.
Janse van Rensburg spring dikwels self in om sy plaasheinings te herstel. Derhalwe het hy jare gelede al begin om sy eie draadspantoestelle te bou.
“Oor die afgelope honderd jaar het draadspantegnologie nog nie baie verander nie,” sê hy.
’n Vinnige soektog op die internet lewer verskeie modelle op wat op die sperrat-beginsel werk en omgereken uit Amerikaanse dollar sowat R400 en aansienlik duurder kos. Soortgelyke toestelle op plaaslike winkelrakke beloop sowat R800 elk.
Janse van Rensburg pas sy ontwerpe voortdurend aan. Sy jongste draadspanner werk volgens hom aansienlik beter as die vorige een.
“Die vorige draadspantoestel het gewerk, maar daar was dinge wat gepla het, soos dat dit die gebruiker nie genoeg ruimte gegee het om die draad te knoop nie omdat sy ketting in die pad was.
“Dit het beteken ’n mens moes gewoonlik die draad ekstra spanning gee om te vergoed vir wat jy verloor het omdat daar nie ruimte vir die draadlas was nie.”
Nog ’n krapplek met die ou toestel was dat dit nie ’n fyn verstelling toegelaat het nie, veral as jy met ouer draad gewerk het.
Laat hoor asseblief van jou as jy ook ongewone, vindingryke planne het. Stuur ’n e-pos na met foto’s en ’n kort beskrywing.