King Price skei die koring van die kaf
Boere is op soek na buigsame versekeringsprodukte wat tred hou met die werklikhede op die plaas, en persoonlike verhoudings met die makelaar. “Pay as you farm” is ’n eiesoortige nuwe produk van King Price wat binnekort juis om dié redes bekendgestel word.
King Price is ’n baanbreker op sy gebied met ’n landbouversekeringsproduk wat daarop geskoei is dat boere betaal volgens hul boerderyomstandighede en hoe hulle boer. Dit is ’n nuutjie in die bedryf. Die boer se premie is gegrond op die werklike gebruik van die toebehore en werktuie – soos trekkers, stropers, mobiele besproeiingstelsels en balers – pleks van ’n vaste premie. Dit bied merkwaardige besparings aan kliënte.
Die nuwe landbouproduk is gegrond op King Price se nuwe motorversekeringsproduk “Pay per k” wat tydens die inperking van stapel gestuur is vir kliënte wat toe minder bestuur het.
“Die produk se prysmodel word bygestaan deur die versekeringsgroep se gebruik van telematiese tegnologie, waarmee bewegings en tydsgebruik van die versekerde toebehore en werktuie noukeurig opgeneem kan word,” sê mnr. Kobus Stapelberg, handelsenlandbouvennoot van King Price.
“Boere is gewoonlik op soek na twee dinge wat hul versekering betref: Buigsame produkte waarmee hulle hul dekking kan aanpas om in hul spesifieke behoeftes te voorsien en om maklik en vinnig veranderinge aan hul polisse aan te bring, en persoonlike verhoudings,” sê Stapelberg.
“Buite seisoen neem boere beperkte dekking vir hul toerusting uit, en verander dit weer terug na omvattende dekking tydens die relevante seisoen. Indien hulle vergeet om die dekking terug te verander, is die kanse groter dat ’n verlies gely kan word.
“Ons werk daaraan om regdeur die jaar omvattende dekking aan boere te bied, maar om die premies aan te pas na gelang van werklike gebruik.”
GROEI IN BEDRYF
Die nuwe produk beklemtoon King Price se merkwaardige groei in die landbousektor. Sedert sy toetrede tot die bedryf twee jaar gelede onder leiding van Stapelberg, ’n veteraan op die gebied, het die versekeringsgroep naam gemaak vir sy gebruik van tegnologie en dataontledings om vernuwende produkte aan te bied.
Danksy tegnologie kan die maatskappy vinnig veranderinge aanbring wat boere nodig het, en voortdurend innoverende produkte byvoeg – soos om hommeltuigtegnologie aan te wend vir die beveiliging van plase en die bestuur van diere. King Price is tans die enigste versekeringsgroep in die land wat dekking bied vir veediefstal, na gelang van die boer se vermoë om streng kuddebestuur toe te pas.
“Ons het maande lank navorsing in die mark gedoen en besef die huidige beskikbare landbouversekeringprodukte voorsien nie in moderne boere se behoeftes nie,” sê Stapelberg.
“Boere wil nie ’n vaste koers betaal vir toebehore en werktuie wat ses of nege maande lank net in die skuur staan nie.
“Telematika word reeds in die vervoerbedryf gebruik en boerdery is die een omgewing waar ’n mens vernuwend kan dink en optree.”