Haal só die meeste uit jou besproeiingstelsel
Talle faktore beïnvloed ’n hoër winsgrens, soos die produksiekoste van saad, kunsmis, lone, brandstof en toerusting. Natuurlike elemente speel egter ook ’n rol omdat die klimaat onvoorspelbaar is. Wanneer dit reën, is dit selde presies hoeveel of waar die boer dit nodig het. Dit is dikwels te laat, te veel, te vroeg of te min.
Boere moet eerstens mededingend wees en tweedens presies weet hoe om opbrengs te maksimaliseer terwyl insetkoste verminder word. In dié geval kan ’n boer besproeiing tot sy voordeel gebruik.
Met besproeiing kan ’n boer die regte hoeveelheid water op die regte tyd toedien, presies wanneer die plant dit in die plantgroeisiklus benodig. Maak seker die besproeiingstelsel dien die water eweredig toe sodat al die plante dit met die minste moeite kan opneem.
GOEDKOOP OPSIES
Boere kyk altyd hoe hulle kan bespaar, maar besparings kan ’n boer duur te staan kom indien dit verkeerd aangewend word. Bespaar op water en elektrisiteit en nie op die aanvanklike koste van die werktuig nie. ’n Groter pypdeursnee beteken laer inlaatdruk en dus energiebesparing. Hou in gedagte dat van hierdie stelsels tot 20 jaar kan hou. Ongelukkig beteken die groter pypdeursnee aanvanklik hoër koste.
Indien die boer ’n vergelyking tref tussen twee of meer kwotasies, moet hy seker maak hy vergelyk die inlaatdruk en vloei van die stelsel vóór hy die prys vergelyk. Kies ’n laedrukstelsel waarmee energie bespaar kan word.
LANG TERMYN
Die instandhouding van die besproeiingstelsel is belangrik. Dit is soos ’n boer se bakkie – as ’n mens na die voertuig omsien en dit gereeld laat versien, kan jy baie jare se werkverrigting kry. Moenie op voorkomende instandhouding bespaar nie en doen dit minstens voor elke seisoen. Dan kan stelsels tot 20 jaar en langer hou.
Wanneer ’n boer byvoorbeeld die spuitpakket op sy spilpunt vervang, moet hy ook die reguleerders vervang. Só bly die doeltreffendheid van sy besproeiingstelsel hoog en die waterverspreiding eweredig. Deesdae is dit algemene praktyk om kunsmis deur ’n besproeiingstelsel toe te dien. Maak seker die stelsel is ordentlik gespoel nadat kunsmis toegedien is. Dit sal voorkom dat reguleerders en spuitpunte verstop. In die geval van spilpunte: Maak seker daar staan nie water in die pype nie en dat alle dreineringsgate oop is.
NUWE TEGNOLOGIE
Moenie bang wees vir nuwe tegnologie nie. Deesdae is beheerpanele beskikbaar wat met ’n slimfoon bestuur of gemonitor kan word. Grondvog- en vloeimeterdata kan ook geïntegreer word en vanaf ’n foon dopgehou word. Só kan boere beter besproeiingsbesluite neem. Verskillende grondsoorte het verskillende behoeftes. Ken jou grond en sit terug wat jy uithaal. Danksy wetenskaplike besproeiing kan ’n boer deesdae besluit hoeveel water of kunsmis hy op watter grondsoort wil toedien.
VERTROUE
Mense doen besigheid met mense. Moenie noodwendig die goedkoopste kwotasie aanvaar nie. Aanvaar eerder ’n kwotasie van ’n onderneming wat jy ken en kan vertrou met hulp en ondersteuning wanneer die besproeiingstelsel probleme gee. Die verkoop van die stelsel is die maklikste deel van die transaksie. Die naverkopediens en bystand is baie waardevoller as om aanvanklik ’n paar rand te bespaar.